蘋果日報 | APPLE DAILY
› 選擇地區
三藩市
紐約
洛杉磯
其他美國地區
馬上成為壹會員

譜出有心人

在學校裏, James是一位心理學系講師,但他的另一身分是音樂人,吸引到學生的注意,「佢哋會好奇,會問我點同歌手相處?問我點攞靈感?師生之間多咗話題。」
最後更新: 0808 11:35 / 建立時間 (HKT): 0903 00:00

今年 32歲的 James(黃安弘)是新晉的作曲人、編曲人兼歌曲監製,至今已推出了約 50首流行曲作品。在學時已對作曲有興趣的他,深知新人在樂壇難以生存,但他沒有放棄,決定雙職工作,一邊教書,一邊投身音樂事業,在不憂生活的基礎上,追尋自己音樂夢,譜出屬於自己的樂章。

以作曲踏入流行音樂的圈子,現時兼任作曲、編曲及監製的 James,曾參與的作品約有 50首,許廷鏗的〈螞蟻〉及〈出走〉、鍾嘉欣的〈落差〉、胡鴻鈞的〈我們繼續演下去〉、吳若希的〈第一天失戀〉及梁佑嘉的〈死撐〉等歌曲旋律都是由他譜出,同時他也是一名大專心理學講師。
4歲已學習鋼琴的 James,有深厚的音樂底子,而接觸作曲由大學時期開始,「當時我係教會嘅司琴,有次教會想演一套舞台劇,配樂就畀咗我去搞,嗰次我要就番情節創作配樂,發現作曲都幾有趣。」

讀心理學

大學畢業後, James去了美國德克薩斯州,修讀教育心理學碩士,讓他有更多空間發掘音樂興趣,「喺嗰邊讀書,平時冇咩節目,咪作曲玩吓音樂,而且有 ebay好方便,可以好平咁買啲二手設備,香港嘅朋友將我嘅作品放上一個分享原創音樂嘅電台節目,雖然主持有批評,但就話首歌有商業味,會有市場潛力,畀到一定肯定自己。」
07年,畢業回港的 James,在中學教了 1年英文,他希望在作曲方面有所發展,決定尋找一份準時放工的工作,「玩音樂始終要投放一定時間,全職教書有好多嘢要帶返屋企做,見大學請研究助理,人工唔錯,最重要係準時放工,分配時間上容易咗。」

得到賞識

早上工作,晚上作曲的 James,於 09年參加了柏斯琴行原創歌曲創作比賽,得到作曲及編曲組冠軍,因此得到東亞音樂的賞識,成為東亞旗下的作曲人,雖然大半年後, James才賣出了第一首作品,是鄭欣宜的主打歌〈有故事的人〉,但他卻大呼幸運!「當時我作咗 20首歌,但都冇咩聲氣,聽聞過新人入行可能 1、 2年先賣到第一首作品,不過自己個心都有啲急,有日東亞打嚟話星煥用我嘅歌,真係好開心。」

自此 James與星煥國際增加了合作機會,「星煥覺得〈有故事的人〉首曲唔錯,仲主動聯絡我合作,之後推出〈配角〉、〈逃犯〉及〈螞蟻〉等歌曲。」
得到了機會也要多作準備,在 12年開始有編曲的工作找上門,「作曲只要將主旋律錄製成 demo就可以交貨,不過自己每次交 demo都會加一啲潤色,星煥見我對編曲方面都有一定能力,開始畀我編曲嘅工作機會。」 James的編曲作品包括胡鴻鈞的〈雙飛〉、許廷鏗的〈厭棄〉及孫耀威的〈好風光〉等。

點入行?

想入行成為作曲人,可參加比賽,或將作品 demo寄去唱片公司。 James表示︰「想做作曲人,至少有一定嘅 skill,可以深造吓先,然後參加坊間舉行嘅作曲比賽,睇自己肯唔肯踏出第一步。」現時作曲人每首曲主要看電台及電視台等播放率收版稅,每 1年結算一次,大約 4千至 2萬元不等,以 James為例,他作曲的〈螞蟻〉,版稅收入至現時約有 4萬元。

難以生存

現時只計作曲, James平均每月收入約$20,000。「出名嘅作曲人,每首歌賣到錢之餘,仲會計播放率收版稅,我呢啲新仔,只計版稅,大約 1年結算一次;其實市場口味會轉,有時流行嘅嘢未必係自己擅長,所以我都要識多幾瓣門路,先會多啲工作機會,或者搵另一份收入支撐生活。」
在朋友的介紹下, James開始兼任大專的心理學講師,「我係 part time講師,時間上會更 free,估唔到學生知道我有作流行曲後,話題多咗,都增進到師生關係。其實心理學成日要分析背後嘅誘因,對於音樂,我會分析番得獎歌曲邊啲部分做得好,從中學習,有時市場口味會變化,自己都要學識去轉型。」現時兼職講師的工作每月收入約有 3萬。

做埋監製

在作曲及編曲有一定成績後,開始有公司找 James監製歌曲,「做監製嘅責任同要識嘅嘢會多咗,好似歌手錄音、後期混音、連幫歌手揀咩曲風都關事,但我做咗監製只有半年,𠵱家主要負責歌手錄音同後期嘅母帶處理等,我有監製過林思傑嘅〈小天使的話〉及草蜢同謝安琪合唱嘅〈聯盟結隊〉,嚟緊連詩雅為電腦遊戲《新天龍八部 online》唱嘅新歌都係由我負責,幾期待大家對新作品嘅評語。」
James對音樂抱有理想,但也要屈服於現實環境中,「有諗過全職投入音樂,但自己嘅發展未夠穩定,暫時會音樂同教書兩邊走,同時增值音樂方面嘅知識。𠵱家同資深音樂人 Ted Lo(羅尚正)學緊 jazz,又向其他監製偷吓師,盡力裝備自己。」

後記:好啲嘅喇叭

去到 James的家中辦工的地方,尤如一個小型錄音室,他說買設備花了三十多萬,「呢啲設備都係慢慢添置返嚟,好啲嘅喇叭、混音器都唔可以缺少,如果出去租 studio,租多幾次條數都喺番度。」看來玩音樂除了有才華,財力也不可少。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載