蘋果日報 | APPLE DAILY
› 選擇地區
三藩市
紐約
洛杉磯
其他美國地區

主執法超過 200場  80後國際足球女球證

最後更新: 0803 05:23 / 建立時間 (HKT): 1007 00:00

在綠茵場上,鮮有女士作為球證。今年 31歲的 Gigi(羅碧芝),現為香港唯一的國際女球證,她分別於 13及 14年獲提名國際女子足球裁判和入選亞洲足協精英裁判,並於香港甲組聯賽、東南亞盃賽及奧運外圍賽等有規模賽事中執法。 Gigi由 07年至今,以主裁判身份執法超過 200場球賽,作旁證亦超過 300場。在球場上,一班大男人也要乖乖的聽她指揮。

自小愛運動的 Gigi,於 06年讀大專時期,已埋下做球證的伏線。「我好鍾意踢波㗎!細個有跟哥哥落街踢波。讀中學嗰陣,我仲有玩越野跑及排球,入過港澳排球代表隊及打過精英賽。升上大學,我揀咗同運動有關嘅科目,當時加埋我只得 3個女仔報讀。我主修足球,讀課程嘅同時,考埋教練牌及球證資格。」
修讀教練課程時,讓 Gigi對足球了解更多,「教練班會講解好多踢波技巧,好似長傳、短傳、橫傳及足球戰術,覺得好有趣!」與此同時,她亦考取香港足球總會註冊球證(新裁判員)資格,並開始考慮畢業後的前程。
「踢過大專女子足球隊,知道喺香港做女子足球員比較難,加上自己起步遲,日後加入球會嘅機會較微。雖然做球證,只能睇冇得踢,但我覺得足球球證嘅工作,有得喺球場度跑及同球員互動,好有挑戰性,想向呢方面發展!」

兼做節目主持

07年畢業後,除考獲三等球證資格外, Gigi同年加入有線電視當體育主播,「香港好少有全職球證,做體育主播之餘,我都 keep住做球證訓練。考咗三等球證資格後,我可以參與 U13、 U14、 U15青年等丙組賽事嘅裁判工作,由旁證做起,做夠一定場數同考試,就可以慢慢升做主裁判員。」
13年, Gigi考取香港足球總會註冊二等球證,及香港足球總會女子足球一等裁判資格,可主持甲組及超聯賽事,「同年我仲獲提名做國際女子足球裁判,通過考試後,有機會執法亞洲足協委派嘅賽事,真係好開心!」

執法最好的一場

令 Gigi最難忘的,是 14年的一場被亞洲足協考核的賽事,「派咗兩位外國導師嚟考核我,真係好緊張同大壓力。當時我執法一場男子甲組賽事,呢一場暫時係我人生入面執法得最好嘅一場!所有走位及決定我都好滿意,我亦成功合格咗。」
入選亞洲足協精英裁判後, Gigi有機會執法大型賽事,例如東亞盃第一圈賽事、香港超級聯賽,及在最近 8月舉行的 U19亞洲盃比賽中, Gigi擔任後備裁判員,「入咗亞洲足協第二年,我已經有機會執法海外賽事,真係好難得!」

亞洲人都做得掂

在今年 8月亞洲盃比賽上, Gigi認識很多執法過世界盃的球證,他們更與 Gigi分享經驗。「有一位日本球證同我講,唔好怕身為亞洲人生得矮細,只要有信心同樣做得好,呢一番說話對我嚟講係一支強心針,令我嘅目標同信念更堅定。」
一場賽事中,有很多變數,球證的判決足以會影響兩隊的輸贏, Gigi坦言亦有過錯失的時候,「有一年嘅東南亞盃,我執法馬來西亞對澳洲嘅賽事,首先係澳洲隊嘅球員被侵犯,過咗一陣到馬來西亞嘅球員被侵犯,但我即時睇唔到,冇判罰到,要事後睇錄影先知。我都幾接受唔到,但經一事長一智,我同自己講,以後喺禁區入面嘅事,我全部都要睇得清清楚楚!」
Gigi主要執法男子賽事,曾遇過性情暴燥的球員,被人用粗口問候,「好多人落場踢波會變咗另一個人,有次有位球員對我嘅判決唔服氣,佢將個波踢向我心口,雖然佢話唔小心,但態度依然好差,最後我判佢紅牌出場。事後經過商議,發現佢有前科,最終被判停賽 10年。我有喺更衣室喊過,嬲自己點解會畀呢類情況發生,希望下次會處理得好啲。」

目標執法世界盃

每逢星期日, Gigi都會執法賽事,「 7至 8月抖暑,其他每個月平均都有 4至 6場比賽。」球證以外, Gigi現為小學體育及數學科老師,「一定會繼續球證嘅工作,希望日後執法更多高水平嘅賽事,有得做世界盃嘅賽事梗係好啦!嚟緊趁仲有機會,想測試吓自己嘅能力去到邊。」

後記:防曬代言人

本以為喜歡運動又經常在球場曝曬的 Gigi,會有一身古銅膚色,但她真人的膚色比想像中亮麗潔白,記者不禁請教她的防曬及美白心得。 Gigi笑說:「我好勤力保養㗎!除每次戶外比賽前搽足防曬外,喺屋企得閒時仲會用保水嘅面膜,搵我做代言人係咪好有說服力呢?」儘管她平日多男仔頭,一說到護膚美容的話題,還是盡顯女性一面。

點入行?

想成為足球裁判員, Gigi建議先訓練好自己的體能,「球證每半年都有一個體能測驗,以往有女仔因為過唔到要退出;我哋平時要練跑練體能, keep住好嘅狀態。」球證的薪金以每場計算,足總每年 5月會舉辦新裁判課程,有志入行者,可緊密留意足總網頁。

晉升階梯

一等裁判員
主要執法甲組及香港超級聯賽等高級賽事
(主裁判每場$1,500/助理裁判每場$1,000)
二等裁判員
主要執法甲、乙及丙組等賽事
(主裁判每場$300/助理裁判每場$210)
三等裁判員
主要執法乙、丙及青年組等賽事
(主裁判每場$270/助理裁判每場$195)
新裁判員
主要執法青年組賽事
(主裁判每場$250/助理裁判每場$190)

香港足球總會 http://www.hkfa.com

撰文:霍芷晴
攝影:崔百祥、陳嘉元
部分圖片由被訪者提供

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載