80後搞網上裝修配對服務

馬上成為壹會員

80後搞網上裝修配對服務
	分享

Woody（左）不時會抽空上工地，查看師傅的手工，「探吓師傅班，除咗了解進度外，都會向師傅取經，汲取裝修知識，咁先唔會畀客人問到口啞啞。」

最後更新: 0803 05:24 / 建立時間 (HKT): 0113 00:00

近年 Online to Offline營銷模式發展迅速，如 Airbnb、 Uber、 HKTaxi、 GoGoVan等配對服務平台不斷融入市民生活當中，讓一些傳統行業出現新氣象， Woody、 Ross及 Raymond看中年輕人愛上網找配對服務，於 13年成立裝修服務配對平台——好師傅，以方便快捷找到裝修師傅配對，及完善的監察制度，吸引年輕家庭客支持。

現時好師傅只有網站平台，但在月底開始會逐漸推出手機 app。

採訪當日，好師傅創辦人 Woody去到大埔一個單位，向裝修師傅了解工程進度，「傳統裝修師傅冇咩渠道接工作，多數係靠人介紹，接觸客戶群較窄，透過好師傅就可以接觸大量潛在客源。目前我哋同約 100位師傅合作，客人只要預早 2星期預約，已可以就客人要求而配對適合嘅師傅，雙方都可各取所需。」
好師傅是一個裝修服務配對平台，操作流程是客人在網站留下初步的需求及聯絡方法後，好師傅便會與客人聯絡及了解需要，然後分派合適的師傅上門，好師傅在當中擔當監察及溝通橋樑的角色，直至工程完成。「客人唔需要向平台付費，我哋會向師傅收番每單工程費用 5%至 8%嘅轉介費，比起傳統嘅中間人收 15%至 30%嘅費用低好多。」
最初 Woody是從親戚朋友中獲得創業靈感，對象亦以年輕家庭客為主，他們愛上網找配對服務，故成立裝修網上平台，可方便他們找到合適的裝修師傅，「身邊朋友開始買樓結婚，搵裝修師傅都係盲頭烏蠅撞彩數，唔係個個夾到，而且聽到唔少爭拋，於是構想整個網上平台，集中一班信譽可靠嘅師傅，畀客人容易選擇，咁啱同做開物業管理業嘅 uncle傾開，認識咗幾位唔錯嘅裝修師傅，就決定開始。」

Woody(左)及 Ross不時開會討論好師傅的發展及提升服務質素。

由兼職做起

13年 7月， Woody找來朋友 Ross及 Raymond創成立好師傅，「 Ross及 Raymond都係讀書時認識嘅朋友，當時大家都各有正職，我做緊銀行投資，諗住當兼職做住先，其實我哋對裝修都唔熟，不斷問師傅慢慢摸索個流程，我負責數字同對外嘅事務， Raymond負責 IT，而 Ross就做 marketing。」
成立之始， Woody需要令裝修師傅與客人認識好師傅這個網上平台，「去睇街招、朋友介紹、行街等去搵師傅嘅聯絡方法，然後逐個約出嚟見面，向佢哋講解我哋好師傅嘅理念及運作模式，因為加入唔使收費，對佢哋有利，大部分聽完都有興趣加入；另外，我哋最初經費唔多，會用 facebook及叫朋友幫手宣傳平台。」

現時好師傅在長沙灣 Good Lab的共用工作空間租用辦公地點。

裝修工程潛力大

14年尾， 32歲的 Woody與 35歲的 Ross看好裝修市場前景，決定全職投入好師傅，「香港有 270萬個住宅，計番 25年裝修一次，一個月都有約 1萬單工程，市場潛力大，平台嘅單亦開始多，於是決定全職打理。最初我哋有提供埋維修服務，但做落發現裝修師傅唔鍾意做維修，而維修師傅又唔鍾意接裝修嘅 job，不如專注啲，打造裝修服務配對平台。」
Woody認為配對平台可以幫助師傅及客人，「裝修師傅同客人出現嘅問題往往來自唔信任，及過多口頭承諾，每個工程由要裝修啲咩、報價單我哋都有紀錄，客人有咩額外要求，我哋都會提醒師傅寫番喺報價單上，免得因有一方唔記得而有爭執。此外，我哋會 keep住聯絡雙方，令大家都了解進度，我哋亦會監察，同時會講解番裝修知識畀個客知，減低對師傅拖延工程嘅猜疑。」
在處理一些爭拗問題時， Woody會盡量做到公正，不偏幫任何一方，「裝修工程多數係分期付款，但試過有個裝修師傅未做完第一期工程就向客人收第二期嘅錢，我哋了解完個狀況後，雖然知個客額外加多咗唔少要求，但個師傅做法真係有問題，即時幫客人換咗個師傅，同時亦將個師傅踢出個平台。」

對於每位合作的師傅， Woody都會遂個約出來見面，並填寫問卷，以觀察為人及記錄專長。

逐個師傅面談

現時好師傅每月約接四、五十張單，裝修費用由$10,000至$1,00,000不等，除了數量外， Woody認為保持師傅的質量最為要緊，「每個師傅加入，我哋都會逐個面談，做問卷了解有咩擅長，見得多都有啲心得，好似對答中會睇到師傅有冇耐性，估到佢對客時會點；之後會不定時去工地睇番啲手工，𠵱家合作嘅師傅至少都有 20年或以上經驗。」
對於未來的發展， Ross表示希望將好師傅打造成優質及方便使用的平台，「嚟緊月底推出好師傅 app，先係師傅使用版，會有工程進度提醒、整理 portfolio等功能，因為幫到師傅，愈易滿足到客人嘅需要，客人使用版亦會盡快上架，畀人更容易用到我哋嘅服務。」

馮先生（客人）：
半年前，買咗個單位，間屋太殘舊要重新裝修，上網見到好師傅，就試吓，佢哋介紹咗位師傅嚟，傾落都幾啱我要求，工程其間佢哋不時聯絡我，知道番個進度，好有交帶，最後出到嚟成間屋都好滿意。

彭師傅：
加入好師傅，搵客唔使自己周圍搵，個平台令我慳咗好多時間，之前多數做開嗰幾個客就係嗰堆，𠵱家會接觸到好多新客戶，啲單會比之前多咗 2、 3成。

點樣 book師傅？

1.客人在好師傅網站留下裝修的需求及聯絡方法。	2.見到留言， Woody與員工會盡快與客人詳談，了解需要及相約裝修師傅的上門時間。	3.挑選合適的裝修師傅上門實地了解，並出報價單。
4.Woody（中）會上單位了解工程進度，如有爭拗亦會出面調解。	5.工程完成後，裝修師傅會上門進行覆檢。	6.正式完工。