› 選擇地區
三藩市
紐約
洛杉磯
其他美國地區
香港 台灣 北美
 

發展伸展運動服務 攻辦公室客

最後更新: 1017 17:46 / 建立時間 (HKT): 1017 14:00

近年市民注重健康的意識不斷提高,從而對與健康相關的服務或產品有更高的要求及需求。任職健身教練11年的阿One( 楊一鳴),認為運動伸展有發展市場,於17年成立一鳴筋肌舒展理療中心,專門提供伸展運動服務,幫助一些常坐辦公室的人士解決肌肉繃緊的問題,針對性強加上效果顯著,令他很快就受到一些專業人士的歡迎。

採訪當日,記者去到位於中環的一鳴筋肌舒展理療中心,在叩門時隱約聽到慘叫聲,來開門的正是創辦人兼伸展教練阿One,他說正在幫客人做伸展運動,「隨住年齡增長,只要唔係常常做伸展運動,身體各部位嘅肌肉都會愈嚟愈繃緊,跟住就會出現唔同嘅痛症,當中以常做劇烈運動,及重複動作嘅人士最易出現問題。我就以伸展運動幫佢哋重新拉鬆肌肉,但過程會幾痛,不過拉鬆後成個人都會好舒爽,伸展運動對解決痛症好有效,就算過程會痛都依然有人做。」

今年35歲的阿One有做健身教練的經驗,同時亦考獲中醫推拿、運動按摩等不同的證書資格,「簡單嚟講係幫客人拉筋,除拉鬆肌肉外,仲可以促進血液循環,及加強肌肉彈性等效果,對健康好有幫助。成套動作係用我嘅經驗及結合醫理去整合出嚟,令客人全身嘅肌肉都得到伸展,嚟幫襯嘅客人主要係30至40歲嘅人士。」伸展運動服務每次1小時,每堂收費$800。

00年,阿One中五畢業後便投身社會工作,做過跟車搬運、廚房學徒及sales等工作,但都不是他的興趣所在,「經屋企人介紹入咗一間健身中心做健康產品嘅sales,知道佢哋請緊健身教練,提供培訓之餘,前景好似唔錯,我就申請內部調職,參加完3個月嘅培訓後,就做咗健身教練。」

運動伸展有功效

其後阿One在不同的健身中心任職健身教練,前後做了11年,他表示自己最擅長伸展運動,「讀書時,我參加學校嘅手球隊,又有玩田徑、籃球等運動,但我嘅肌肉容易繃緊,之前會去搵人幫我按摩,但都係治標唔治本。健身中心有提供伸展運動服務,不過只係順帶嘅性質,真係嚟參加嘅客人唔多。喺我接觸過後,覺得好有用,肌肉鬆咗,於是我就深入研究,大多數嘅伸展運動班亦開始由我去教。」

阿One看到運動伸展的市場潛力,決定在17年,創立一鳴筋肌舒展理療中心,主打為客人提供伸展運動服務,「見到市場開始追求高質嘅健康服務,伸展運動係外國幾流行,我想試吓喺香港專門做呢樣嘢,決定出嚟創業。我嘅目標客人係一班肯花心機及錢保養身體嘅人,例如會計師、律師、銀行家等專業人士,喺揀地方時都要近商業中心,最後租咗中環嘅樓上鋪。」

先讓客人親身體驗

阿One表示創業初期,先要讓客人明白甚麼是伸展運動,「好多人都唔知乜嘢係伸展運動,或者覺得同喺做運動前嘅熱身拉筋差唔多,自己做都得。其實當中有唔少技巧,另外背、臀等部位,單人較難拉到。我覺得畀到佢哋親身體驗先會明白,於是搵之前做教健身時儲落嘅熟客嚟免費試堂,同時又搞$300試堂優惠,慢慢建立口碑。」

現時一鳴筋肌舒展理療中心成立大半年,阿One正着力發展業務,「我有搵其他伸展教練嚟幫手,除咗工作外,我仲會投放多啲時間喺宣傳上。我有同公司機構及行業公會傾合作,舉辦有關運動伸展嘅講座;另外,我亦有贊助香港沙灘排球隊、南華嘅籃球及手球隊,佢哋嘅隊員可以免費嚟做伸展運動。」facebook@onestretching

點入行?

對成為運動伸展教練的人士,阿One表示可以報讀坊間相關的證書課程,學習技巧,「最緊要鍾意做運動,肯學習。如果本身冇興趣,好難會花心機及時間堅持落去,運動伸展要學習肌肉嘅生理結構、識運用唔同嘅伸展工具及伸展唔同部位嘅動作,唔少健身中心都會需要呢方面嘅人材。初入職做伸展教練月薪約$12,000。」現時身為一鳴筋肌舒展理療中心創辦人及伸展教練的阿One,年薪約有80萬。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載