› 選擇地區
三藩市
紐約
洛杉磯
其他美國地區
香港 台灣 北美
 

媒體藝術家 用機械創作裝置藝術

建立時間 (HKT): 1019 15:30

隨着科技的發展,藝術的展現加入了科技的元素,80後的媒體藝術家Kenny(黃智銓),就擅長結合機械及聲影創作裝置藝術。這6年間,他的作品獲邀去英國、奧地利、杜拜、巴西及韓國等國家參加展覽。17年,他加入了跨媒體創作公司IOIO Creative,希望造出一些成功結合商業及藝術的作品,在商業當道的社會中, 行出自己的創作路。

人與人的關係,人的內心世界,是不少藝術家的創作靈感來源,而Kenny的機械藝術裝置就喜以展示個人的心理狀態,「呢個作品叫《傾覆》,螢幕會不停轉動,螺旋槳旋轉嘅噪音,令人覺得不安及緊張,但螢幕上女仔嘅動作又令人想行近啲望清楚,作品展現嘅平衡及對比、吸引力及排斥感,係想帶出喺走向愛情嘅路上,人嘅內心不斷調整及適應唔同嘅不安狀態,表面上好似冇問題,當中又好似深藏暗湧。」

今年30歲的Kenny是一名媒體藝術家,擅長製作機械及聲影的藝術裝置,「做咗6年嘅藝術創作,鍾意利用機械去呈現唔同嘅生活及人與人之間嘅體驗,喺香港比較少人去做。同時我亦係IOIO Creative嘅creative technologist,現時好多公司都想用藝術裝置嚟做宣傳嘅工具,好似最近我有幫福州嘅樓盤飛鳳山設計一隻機械鳳凰,喺展銷現場與樓盤影片呈現畀觀眾,從而產生吸睛嘅效果。」  

自學機械智識

Kenny於香港城市大學修讀創意媒體,當時他對機械已有濃厚的興趣,「學校會教設計及科技方面嘅知識,同時我自學有關機械、摩打及電子,我嘅畢業作品設計咗一個互動裝置《10Hz》,當中包含升降儀器、光影及聲音等部件,裝置會產生閃爍嘅效果,而個頻率令體驗者感受到唔同嘅影象。」《10Hz》於11年的第16屆ifva香港獨立短片及錄像比賽獲得金獎,這亦是Kenny第一個獎項。

畢業作品得獎,讓Kenny嘗試走向一條少數人會走的道路,「見到自己作品拎到獎,自己又鍾意藝術創作,想試吓搞藝術可以行到去邊一步。喺11年畢業後,我先喺大學做咗一年嘅資料搜集員,儲起啲錢,之後嗰年就全力做藝術創作。當時我與唔同嘅藝術家合作,創作咗《Digital Hippocampus》、《The Mechanics of Shadow》等機械藝術裝置,參加唔同嘅香港展覽,豐富咗自己嘅portfolio。」

獲邀參加國際展覽

經過一年的努力,Kenny明白單靠藝術創作難以在香港維生,開始尋求外國發展的機會,「有咗之前嘅portfolio,我開始申請參加外國嘅藝術比賽,同時亦有展覽邀請我去參加,例如奧地利林茨電子藝術節、波蘭WRO媒體藝術雙年展等,亦有試過到英國Phoenix電影及藝術中心舉行個人展覽。雖然有啲會有錢收,約係5千至3萬之間,但要維持生活及創作係唔夠,所以我有幫人寫手機app、接互動裝置編程及製作嘅freelance嚟維持生計。」

15年,Kenny憑着在各國舉辦展覽的履歷,得到加拿大Concordia University的獎學金,進修雕塑碩士課程,「我想學多啲有關藝術嘅技能,充實自己。當時我有諗過不如移民過去,因為喺香港搞藝術創作真係好難,但喺國外生活期間,與唔同嘅藝術家傾過,自己亦有體驗,香港係一個多樣性嘅國際城市,喺香港做創作可以接觸唔同人,同時又好易傳遞去唔同地方。另外,作為一直生活嘅地方,當中嘅人同事物,都容易令我有創作靈感,最後我都係想繼續留喺香港做藝術創作。」

加入公司穩定工作

今年6月,Kenny決定加入香港的跨媒體活動製作及策劃公司IOIO Creative,令生活有保障。「上年佢哋有搵我為一個展覽做顧問嘅工作,合作期間知道佢哋公司係以跨媒體嘅創作為主,工作上可以運用到我嘅專長,令我有發揮嘅空間,算係穩定收入嘅工作。另外,上司都支持我嘅藝術創作,佢哋嘅成員有擅長設計、程式編寫、marketing等,可以幫到我,所以我決定加入佢哋,嚟緊會繼續創作更多個人作品,希望將唔同角度嘅體驗帶畀市民。」

後記:名牌唔使諗

在觀賞Kenny不同的藝術作品時,他述說每件作品背後要表達的意思,記者內心已經斷定「藝術嘅嘢,我真係識條鐵咩!」雖然看不明作品,但亦無阻記者感受藝術創作面對的挑戰。Kenny說︰「以前賺到嘅錢,大部分都係投放番喺創作上,你唔會知下一次收到錢係幾時,平時生活都要計過,只會買必需品,名牌係唔使諗。」對於喜愛購物的記者來說,購物的心魔真是難以抗拒,藝術家這條路看來是走不了。

點入行?

Kenny表示有意加入媒體製作, 要有自學精神及良好的溝通能力,「呢行需要programmer及designer,有興趣入行嘅人士可修讀有關 creative media及computer science嘅學科。呢行正處於發展及摸索嘅階段,作品上亦追求新意,所以我哋要不斷跟貼世界嘅資訊,保持學習嘅態度;一件商業 job唔係一個人就可以完成,要識得與同事合作及溝通,先可以整到一件好嘅作品。」現時Kenny月入約$33,000。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載