› 選擇地區
三藩市
紐約
洛杉磯
其他美國地區
香港 台灣 北美
 

90後搞電子化 創一站式殯儀網購平台

建立時間 (HKT): 1115 13:00

殯儀是人生的告別式,當走到人生的最後一段路,總希望能留下美好的回憶。今年27歲的檵垣,於10年入行,由雜工做起,到12年自組公司裕祥殯儀,至今已協助過無數家屬與先人道別,他希望將每場儀式都辦得妥妥當當,不為任何人留下遺憾。因近年辦喪禮的客人有年輕化的趨勢,故他創立了殯儀網上平台,方便客人安排及了解殯儀儀式的各項細節。網上平台圖文並茂介紹流程及用品,客人可以網購有關服務,收費比以前更透明化,運作亦相對便利及貼地。

在裕祥殯儀的網站首頁,透過短片介紹了殯儀資訊,包括喪禮流程、墓地環境、申請手續及香港常用的棺木資料等,檵垣表示:「網站設有自選殯葬計劃,客人可以自由選擇中或西式喪禮、想用嘅棺木種類、想喺邊間殯儀館出殯、壽衣種類及旅遊巴安排等細項,完成選擇後,客人仲可以即時睇到所需收費。若揀喺醫院出殯,一切從簡,最平由$11,000起。」

網頁按項目帶領客人作出選擇,手續確實比傳統人手開單來得清晰。檵垣觀察到近幾年的客人開始年輕化,25至35歲的客人佔了約一半,他覺得殯儀業應該貼近時代步伐,邁向電子化,故他推出網上平台。「好多年輕人都唔知出殯嘅流程,所以我哋網站有提供簡介,等佢哋對殯殮開支有預算。程序會係先聯絡殯儀館,預約時間商議細節及安排火葬日期,之後我哋會陪同客人去醫院或殮房領取遺體,再領取死亡文件。然後,由我哋代辦理死亡證及預訂火葬場時段,安排殯儀服務所需用品,再慢慢講解及安排喪禮細節。」

自選形式收費

檵垣表示傳統殯葬服務都是綑綁式收費,一般要10萬起,故檵垣在網站推出自選殯葬計劃的另一原因,是希望收費可以透明化,讓客人選擇真正需要的項目,如果客人能真正選擇所需的用品,便可節省3、4成費用。「當中有啲用品,好似白衫、白褲及骨灰盅等,客人可能自備,唔需要用到,但package包埋,都要畀錢。用自選計劃,可以彈性處理,如果親友唔多,可以訂28座旅遊巴,唔使訂48或60座,全部由客人去選擇。」當客人在網站留下聯絡電話後,半日內會有同事跟進,費用將於出殯當日以現金或支票方式收取,檵垣說:「有唔少客人都覺得好方便,有咗網站後,生意多咗3至4成。」

09年中學畢業後,檵垣做過客戶服務及電腦售貨員,但發覺不太適合自己,而他的叔叔一直從事風水及殯儀業,故他便想入行一試,「10年正式入行, 由雜工開始做起,跟師傅學開單、拎死亡証、訂火化爐及訂殯儀館等程序。最初喺公司與同事溝通會好唔習慣,佢哋講嘢比較粗魯,我初入行乜都唔識,佢哋仲會輕視我。」

行內用語溝通

為了打破與同事間的隔膜,檵垣花心機學習行內用語,爭取他們的信任,「多啲放下身段問問題,用多啲行內用語嚟溝通,好似拜託佢哋做嘢時,我會話:『大周、大周』,即係『拍爛檔唔該晒』咁解。平時我仲會請佢哋食早餐,了解佢哋嘅興趣,增加共同嘅話題。」

檵垣一邊學做人處世的態度,一邊認真學習行內的知識,他表示不同鄉下習俗與禮儀最難記。「水上人嘅喪禮有個『還米債』嘅儀式,由女兒去做,以表盡孝道,事前要準備油、醬、米及菜;廣東人就有『剪被角』嘅習慣,即係先人留褔氣畀後人;潮州人嘅祭品較多,要用真金屬造嘅橋,和尚要識潮州話。」

改變行內風氣

經過兩年時間學習,檵垣不但慢慢上手,更對殯儀工作漸漸投入。「雖然呢兩年我學到好多殯儀嘅知識,但同時見到行業中好多不良嘅風氣,好似好多殯儀館都唔鍾意開平單,張張都要5萬起跳先會接;銷售手法都好有問題,成日唔計基本用品及火葬費,導致成日出現追加收費嘅情況。另外,呢行嘅土工,大部分都有一定年紀,態度亦比較懶散。基於上述種種原因,我喺12年自組公司,希望一改風氣。」

檵垣找到一批行內相對年輕的土工合作,人均年齡約30至40歲,他們工作認真,會與客人交流,「試過有次出咗車先知冇帶壽衣,佢哋都有準備後備,好可靠。大家理念相同,都好快贊成合作。」被問及叔叔會否反對網上平台服務時,檵垣表示:「佢好支持我,佢覺得時代進步,行業需要革新先有得傳承落去。」

另一方面,行內殯儀公司十之八九是世襲形式經營,檵垣坦言初初曾擔心客源,亦擔人會被同行敵視。「大家都係公平競爭,都唔驚得咁多。之前我會接觸好多NGO,佢哋有介紹客人畀我,我仲會接慈善殮葬,幫多啲嚟自各階層嘅人士。」  

參考坊間價錢

在開公司的同時,檵垣推出了網上平台,並不時進行優化改善,「網站都需要宣傳,我主要用google關鍵字,亦有好多媒體報導。」檵垣指做網站時,要面對不少困難,「因為冇人畀我參考,由諗界面到報價系統,都要慢慢試,再聽客人意見去改善。每個細項嘅價錢,我都參考過坊間十幾間殯儀館,再去調整。」

現時裕祥殯儀每月約接15至20張單,月賺約10至15萬。檵垣說:「以前有關殯儀嘅資訊比較封閉,我希望日後可以多啲推廣生死教育,透過講座及網站,畀人了解更多殯儀嘅知識。」

後記:閉氣工作

採訪期間,突然傳來陣陣腥臭味,記者對臭味很敏感,差點反胃,然後問檵垣:「係咪有運魚嘅車經過呀?」他回答:「係『鹹魚』。當真正接觸時,味道強過現時100倍。」記者頓時目瞪口呆,同時臆測着檵垣工作時會否經常反胃,他卻笑說:「我多數閉氣,有時靈車太大味都要用煙燻一燻先可以再用。」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載