› 選擇地區
三藩市
紐約
洛杉磯
其他美國地區
香港 台灣 北美
 

美術指導要投入角色 營造生活感

建立時間 (HKT): 1201 19:15

說到電影美術指導,很多人可能對這個職位感到陌生,他不似演員那麼奪目,也不是導演那麼聲勢浩大。但這個職位有着至關重要的作用,美術指導的設計是一套戲由文字變成畫面的基石,很多時候美指所做的工作比觀眾想像的還要多,比畫面上所見的還要多。今年35歲的張蚊是行內擁有藝術家之手的美術指導,每次她設計電影場景時,總喜歡投入角色,營造出生活感,凡事著重細節,個性十足。

「道場入面嘅神壇、長凳甚至趟門都係由人手用木揼出嚟,然後再造色、造舊,最後成為大家眼前只屬於《空手道》嘅道場。」早前上畫的電影《空手道》,當中極具日式風格的空手道道場佈景獲得不少影迷的讚賞,每一條橫木的設計及擺放,都是出自於美術指導張蚊之手。

阿蚊習慣做每一套戲的美指時,會親自代入角色,「以《空手道》嘅平川真理為例,前期搭景到中期拍攝休息、放飯嘅時候,我都會留喺道場嘅房間內攞靈感。呢個角色鍾意飲酒,我就喺榻榻米上飲酒,飲完酒樽就放喺枱面。角色瞓醒後,張被會亂擺,我都會試吓攤喺度,起身將張被亂擺,就咁漸漸堆砌出畫面所謂嘅生活感。揣摩人物嘅性格,亦有助設計服裝造型。」阿蚊表示畫面中的一粒塵都關美指事,「為咗令《空手道》嘅畫面有日式柔和嘅效果,喺拍攝嘅時候,會搵人喺側邊拍塵。」

構思電影場景

今年35歲的張蚊有豐富的電影美術與服裝指導經驗,她表示美術指導與服裝指導的工作其實是相輔相成的。美術指導的工作是負責電影每一個畫面中看得見的死物,包括場景、佈景、陳設、道具、色調及燈光等;服裝指導則負責演員身上的任何衣物及飾物等。「接到劇本後,美指要開始構思電影場景及人物造型,喺蒐集相關嘅資料後,要同導演及製片溝通,跟住要去睇景、挑選道具傢俬及陳設,演員造型定妝等。喺拍攝當日,就到現場微調每一個畫面嘅構圖。」

阿蚊於11歲去了英國讀書,由於兩個姐姐都是電影工作者,分別是電影的監製及製片,令她自小便與電影世界接軌。「喺14、15歲時開始,每年放暑假返嚟冇乜朋友,悶嘅時候就跟家姐去片場玩,做過茶水、打雜、幫手拍making of、幫美術部畫畫、做臨時演員及替身。」  

鍾意周圍走

04年,阿蚊畢業於倫敦藝術大學的藝術學系,之後她回港參與電影電腦特技的工作,06年為電影《迴路》做翻譯成為契機初嘗美術指導一職,從此便下定決心由低做起,「我接受唔到日日對住部電腦,我鍾意周圍走,覺得美術指導呢個崗位可以帶畀我現場感。我寧願由助理美指、助理服裝開始做起。」她成為張世宏先生的助理美指後,獲得不少機會,參與作品包括《軍雞》、《新宿事件》等。

在擔任助理美指一職後,令阿蚊明白拍電影是整體的工作,嬌正了自身的紀律問題。「只係一個好小嘅崗位,都可以影響成個拍攝進度。當初入行,自己成日遲到,經常俾人鬧,加上自己唔夠謹慎,試過帶漏演員要着嘅衫,要馬上搭車返去拎,劇組因為咁要暫停拍攝兩個鐘,自始明白到個嚴重性。」

提名金像獎

10年起,阿蚊正式擔任廣告、電視劇、電影的美術指導。13年,她以《殭屍》榮獲提名第三十三屆香港電影金像獎最佳美術指導,不少耳熟能詳的電影美術都是出自阿蚊的手,例如《遊》、《選老頂》、《同流合烏》,及早前上映的《西謊極落:太爆.太子.太空艙》等。

阿蚊表示入行多年常常經歷「爆獲」,即一些突發情況,其中印象最深刻的是為《殭屍》內的角色小白與媽媽設計居住的地方,這是一個滿佈密密麻麻電線及電纜的電表房,靈感來自電影《異形》的太空艙手繪圖。「一開始同道具組用咗幾日時間去堆砌出一幅排列整齊嘅黑色電線牆,導演睇完後好滿意,話想要多40倍數量嘅電線,但剩番12個鐘頭就開拍。當下我哋即刻去勻港九新界嘅五金鋪搵黑色電線及大量粗幼唔同嘅水管返嚟噴黑佢再砌。」最後配合攝影鏡頭,帶給觀眾震撼感,全賴美指與道具組一夜通宵工作的成果。

最緊要造舊

阿蚊認為電影美指最重要的是將每一樣佈景、道具、服裝造舊,「師傅張世宏教落,每樣道具喺鏡頭下都唔會係新簇蔟,所以牆紙要造色、窗簾及衣服要進行石洗。曾經試過被演員質疑過,一對連close up都冇嘅布鞋都要造到咁舊,但呢樣係美指嘅責任,要令佈景及道具有生活感,說服觀眾每一樣物件都有故事。」阿蚊表示生活中最不經意的物件才能最凸顯人物的性格,所以她經常儲起一些不起眼的生活瑣物來做道具,例如紙巾包裝袋、電子收據單等。

雖然13年的金像美指與阿蚊擦肩而過,連旁人都大感可惜,但阿蚊卻說:「我由細到大嘅夢想係想做一個藝術家,希望未來會做到藝術創作及電影美指兩方面嘅平衡。如果有機會,我都想試吓做導演。」

後記:周圍走

面對媒體的一些稱讚,阿蚊會感到不好意思,「我哋呢行其實個個都係搭景㗎啦,搭景一啲都唔出奇,反而驚俾同行嘅人笑,搭景有幾勁啫?」是次訪問,記者跟隨阿蚊工作了一整天,真正體會到電影美指的工作,遊走於旺角不同的牆紙鋪、窗簾鋪,再到電影現場睇景,檢視搭景進度,最後還陪伴阿蚊回到工作室開會。其實記者的工作也不惶多樣,也是要周圍走,最後回office寫稿。

點入行?

阿蚊表示有興趣入行的人士,可先報讀坊間有關設計或藝術的課程,另外,還要懂得基本Photoshop、Sketchup畫3D圖的技巧。阿蚊說:「入行多數跟師傅學嘢,可以自薦入行由助理美指做起。以我開嘅公司為例,每次開拍電影會請約5、6個freelancer幫手,包括助理美指及助理服裝。我仲係香港電影美術學會嘅執委,會舉辦講座,想做多啲培訓及推廣,畀多啲人了解美指嘅工作,想入行嘅人士可以留意香港電影美術學會facebook嘅專頁。」入行通常以freelance助美或助服形式受僱,以一套電影為例,簽約3個月,每月薪金約$10,000。
個人網址:www.irvingcheung.com
[elf] Production Limited:www.elf-production.com
facebook@Irving Cheung

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載