蘋果日報 | APPLE DAILY
› 選擇地區
三藩市
紐約
洛杉磯
其他美國地區

網上集資 運動布料造恤衫

2,168
建立時間 (HKT): 0109 13:00

要落足心機營造一個莊重專業的形象,恤衫上又豈容得下幾條摺痕的出現?今年33歲的Ambrose,於布料公司工作,因為工作關係,經常飛到外地見客及開會,但平日穿恤衫上身都會皺,更莫說放在行李箱,會是皺到甚麼程度了。因有此煩惱,他便嘗試使用運動衫常用的布料來製作恤衫,防皺透氣又有彈性,適合不同場合及天氣穿着。他先於Kickstarter集資,反應比預期好,2個月便賣完第一批貨,現時他創立的品牌Vacanza Shirts以網上商店形式營運,月賺約3萬。

C AllStar的演唱會於去年10月完結,演出所用的熒光西裝,全出自Ambrose的手筆,「因為佢哋要跳舞,活動範圍大,所以就試吓用彈力布料幫佢哋整西裝。雖然暫時未推出西裝款,但係我嚟緊嘅目標。」採訪當日,Ambrose穿了自家品牌的恤衫,更立即示範其彈性,「手臂及背脊位,拉到幾十厘米都得,提高穿着者嘅活動能力,唔會成日扯住,舒服好多。經拉扯後,恤衫一啲摺痕都冇,基本上唔洗熨恤衫,真係好方便!」

Ambrose指恤衫採用了意大利高科技運動布料,物料為尼龍加彈性纖維,並使用了針織織法,可以防皺透氣,兼有彈性,集多功能於一身。雖是運動衣服的布料,但外觀上與市面上的恤衫無異,絕對能應付大場面之餘,又着得舒適。

今年年中,Ambrose在Kickstarter以眾籌的方法為自家品牌Vacanza Shirts集資,用了一個月時間集資約13萬,製作了220件多功能恤衫,並於2個月內沽清,「用眾籌形式除咗容易籌集到起動資金外,同時可以測試市場反應,唔怕砸貨,又可以畀多啲唔同國家嘅人認識品牌。」每件多功能恤衫售$998至$1,398,雖比一般恤衫貴1至2倍,但反應比預期好,「客人以從事金融、律師及銀行等office客為主,年齡約25至45歲,佢哋比較肯花錢買嘢。」

現時多功能恤款有普通款、撞色款及暗花款,每款約有4至5種顏色選擇,如白、粉紅、灰及深藍,Ambrose表示白色最好賣,「除咗顏色多外,細節位我哋都花咗心思,主要參照英式嘅領口設計,比較闊身,順應潮流;另外,袖口方面,我加咗雙面鈕,可以做到傳統款式及法國款式,可變袖口呢個設計,暫時都幾受歡迎。」

因為夏天所以創業

雖坊間很早已推出防皺恤衫、透氣恤衫及快乾恤衫等,但集多樣功能於一身的恤衫則少之有少,而Ambrose最初設計防皺透氣恤衫的念頭,是始於香港天氣太熱,「我成日要外出見客及出trip,夏天先最難搞,行兩步已經出汗,好易有味及汗漬,真係好唔方便!」

畢業於HKU Space市場營銷及品牌管理系的Ambrose,自11年起便在一間專賣運動服裝布料的意大利公司工作,「我平時接觸好多透氣、速乾、有彈力及輕身嘅運動服用布料,客人會用嚟做唔同嘅運動服裝,好似泳衣、瑜伽服、哥爾夫球衫及網球衫等。」因對各種布料的特性很熟悉,令他萌生出製作多功能恤衫的念頭。

造樣辦有難度

Ambrose邊在意大利布料公司工作邊創業,「因為我向公司買布,所以佢哋當多個客戶,亦好支持我去發展呢門生意。」然後,他於去年1月成立Vacanza Shirts。然而,他表示製作第一件樣辦時的情況很嚴峻,「完全唔得!第一件真係太差,因為布料好有彈性,而照番一般恤衫紙樣去造,就變到闊袍大袖,好似做大戲咁。」就修改紙樣及與師傅溝通方面,他都花了約4至6個月作改善及磨合才成功,「要用嘅衣車唔同,手勢同平時有分別,領口都改良咗4至5次,本身太軟,唔夠挺身。」

雖然Ambrose修讀市場營銷出身,但他表示宣傳上有些不習慣的地方,「我以往對客都係B to B形式,現時要以B to C嘅形式宣傳,真係冇乜經驗,最大問題係喺字眼上。平時對公司客,用專業名詞嚟介紹布料嘅功能,好似防紫外線至UPS 50+,及彈性有360度就會明白;但對零售客,佢哋聽完會唔知我講緊乜,所以我要改變present嘅方法,集中直接講功能,好似防曬好好,可以保護皮膚及布料每個方向都有彈性,唔係單向,會有無拘無束嘅感覺。」

增設寄賣點

改善了宣傳用字後,Ambrose以網頁及人傳人的方式宣傳,「Kickstarter令品牌曝光率多咗,有店鋪搵我合作,喺佢哋店鋪寄賣,例如K-11嘅Backer Stores,有實物畀人試,有得摸上手感受質料會易啲吸引人買。」Ambrose現主力靠網店銷售,加設寄賣點亦令生意有明顯增長,實體鋪寄賣佔整體生意約2至3成。

時每月約賣出80件多功能恤衫,月賺約3萬,Ambrose表示:「現時主要集中男裝,來年3月會推出女裝,亦計劃設計西裝。希望可以搵更多鋪合作,未來嘅目標係開自己嘅實體鋪。」

袖口變法

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載