【蔡瀾係熟客】九龍城黎明劏豬劏到坐擁5物業 豪花百萬買雀籠最愛撚雀做瑜伽

更新時間 (HKT): 2019.12.12 06:00

九龍城衙前塱道,半條街便有三間豬肉檔,競爭激烈,街頭有以平價豬肉見稱的連鎖店,位於街尾的一間卻突圍而出,經常人頭湧湧。這間新興肉食已有過半世紀歷史,舖位的一半分租給牛肉檔,亦是長龍店。豬肉檔老闆吳光偉,看來四十開外,手瓜起腱,腰腹沒半點贅肉,經常笑容滿面,原來已五十有八。街坊愛稱他為「男神」,或「九龍城黎明」。

街市佬工時長,終日埋頭苦幹,阿偉卻十分懂得享受人生。凌晨四時開工,下午太太接力後,他便自由活動。他說自己是兩種癡:一種癡是運動狂,游水、跑步、跆拳道、泰拳、健身都涉獵過,近十年迷上瑜伽,是每日例行公事;另一種是寵物癡,養過蛇、牛蛙、貓、狗、烏龜,最愛便是養雀和觀賞鳥籠玩雀杯,單是雀籠收藏保守估計價值過百萬元。

「老實講,街市佬好多都係死做爛做,工作時間太長,又經常體力勞動,好似我放工後,寧願睇電視瞓覺,邊會好似佢咁下午再去做運動。」新興文記牛肉檔輝哥說。記者為訪問阿偉跟足幾日,不得不佩服他的精力。凌晨四點幾開始拆豬,在企檔企足一個早上,下午便頻撲地到旺角做瑜伽,晚上回來再幫忙收檔。每到早上,是豬肉檔最繁忙的時間,通常只有他一人企檔,一人同時要應付十多個客人,卻分身有術,「阿妹,今日煲乜湯?用豬尾骨啦。」、「呢個脢頭,好腍好腍,連冇牙都覺得腍。」、「收你齊頭,再送你呢嚿肉。」他間中還會夾雜英文,甚至是泰文。「和豬肉有關嘅英語我都識,但出到去就唔得喇。泰文我都冇問題,喺檔口做得耐自然就識。」豬肉佬口才好、懂得冧客是基本,不過最重要的還是豬肉。「我賣嘅豬一定要係五豐行,有信譽保證。豬其實有好多種,平嘅多數係外省豬好似湖南、湖北,喺較遠地方運過來,豬身子都變弱,仲有曾生仔嘅豬婆、用來配種嘅豬公,有啲人話有時食到豬肉有臭味,就係呢啲豬。我賣嘅是廣東豬,約百五、百六斤,價錢當然較高,但我主力做門市冇所謂,最靚同最差價錢相差三分一。」他舉起一塊五花腩,一層一層,層次分明,油脂很少。「等於人嘅六塊腹肌,一啲油都冇,脂肪好似郭富城腹肌咁,呢啲豬肉就好靚喇。」那為甚麼不賣本地豬?「本地豬冇公磅,佢哋話隻豬幾重就幾重,有機會呃秤。」

藝人齊幫襯 聞名九龍城

不少熟客專程跨區過來九龍城幫襯,熟客王先生說:「我住深井,專登揸車嚟買豬肉,認得人同舖,呢度重量足,豬肉新鮮,肉味同其他差得遠,你要乜,佢都可以介紹到畀你。」訪問期間記者遇上藝人泰山、胡諾言幫襯,連食家蔡瀾都是熟客,更曾送贈兩幅字畫給阿偉。「嗰時我企檔,有個女人走嚟買豬肉,話想煲粥,我話好呀!就畀咗豬軟骨佢。第日呢個女人同蔡瀾一齊嚟,蔡瀾問我:『噚日你畀我嗰啲係乜嘢骨?嚿骨好正。』之後十幾年來都搵我買豬肉。」阿偉全盛時期日賣二十六隻豬,由於今年豬瘟令供豬量大減,現在減至日賣六隻,一隻豬來貨價約六千至七千元,每隻豬賺約四成。

阿偉爸爸六十年前已在此舖位賣豬肉,高峯時有三間舖。「我爸爸賺錢好叻,佢本身賣開臘味雞蛋,但後來見豬肉好賺,中途轉行,又畀佢成功咗。但佢使錢都好叻,嗰時八十年代打一場麻雀輸六千蚊,一份夥記人工都係三、四千蚊,佢日日都係咁,寫支票打麻雀。」同一條街有三間舖,原本想三兄弟一人一間,最後因爛賭輸剩這一間。「佢當時欠咗廿二萬賭債,見我們三兄弟冇人繼承,本身連呢間都想賣走。嗰時我好鍾意去玩,經常去disco夜蒲,當時我太太意外懷孕,自己學歷又唔高,與其出去打工,不如返嚟接手,嗰陣我太太十七歲,我十九歲,兩公婆拍住上,賣豬肉做到而家,見到爸爸咁,我更加唔會去賭錢。」阿偉接手後便幫爸爸還賭債,總共還了一年多。

太太抵得諗 一人做一半

「年輕時同而家都係咁有型,佢話乜都會玩,只係唔玩女人。」位處同一條街的義香荳品負責人鳳姐如此評價阿偉。他住舖位閣樓,每日下午兩點半收工,其中一個嗜好是養雀。「我喺網上見到呢對南美鸚鵡全世界只有千五隻,又畀我買到,呢對鸚鵡差唔多買咗十萬蚊。」養雀仔已經有三十多年,伴隨而來的興趣是儲雀籠及雀杯,他說這個嗜好很敗家,家中有雀籠約廿個,大部份收藏是由已退休的本地四大雀籠名家製作,保守估計價值過百萬元。「呢啲真係自己鍾意,我好少會賣走,如果係當投資,不如去買樓買股票啦!」阿偉說,昔日自己玩雀籠雀杯很瘋狂。「有一次喺茶餐廳見到一套雀杯好靚,就求佢轉讓畀我。嗰陣好興戴金銀潤(勞力士),佢望住我隻手錶,叫我即刻除畀佢,再補兩萬蚊,我就跑去滙豐攞兩萬出嚟,再跑返茶餐廳拿走套杯。通常見到心水雀籠,我便會捐窿捐罅去求人賣畀我。」

做街市為何有時間追求心頭好,還是他的朋友小明一語中的。「冇人似佢咁,錢多,太太又肯為佢做,如果太太唔幫佢做,他好大鑊。」阿偉太太相對文靜,下午通常由她一人負責企檔,切起豬肉來,巾幗不讓鬚眉。她無奈地笑說:「咁多嘢等佢去玩,他點會定性吖!我都想我去玩,佢去企檔,你睇吓佢肯唔肯?總之唔係太過份,我都會就佢。佢又唔會搵另一個女人,咁咪就吓佢囉,要想辦法留住佢個心。」連阿偉亦半開玩笑地說:「我太太真係強人嚟!如果可以娶多個就好喇,我可以再做少啲。其實因為我哋凌晨四點開檔,一直至晚上八點先收檔,時間太長冇可能一個人做,我做一半,佢做一半,就可以攤分。我哋有夥記幫手拆豬,但始終企檔係要管數,唔可能畀夥記做。」阿偉有一子一女,但都沒打算繼承豬肉檔,阿偉預計數年後便退休。阿偉女兒說:「雖然爸爸而家身光頸靚,有咁多雀籠、物業喺手,但佢同媽媽真係好努力,做足幾十年,是付出努力同青春換嚟。你問我點解唔做,我唔似佢哋咁刻苦,而且我哋每人都有一層物業喺手。」阿偉說:「我唔識做老竇,總之佢哋舒服就得,能力範圍內做到就做。佢哋冇人肯接手,我覺得好可惜,如果阿仔願意當然最好。我經常話鋤好塊田,等佢嚟割禾都唔願意,真係笨!佢答我一句:『我有樓、有車,如果係你會唔會捱?』」

果然好玩 籽在四方,即like「果籽」FB專頁!
BannerBanner