【新蒲崗黃店】42年金寶冰廳被誤認為藍店 8深黃孫仔女回巢撐95歲爺爺:「佢知點解咁多後生仔走出來」

更新時間 (HKT): 2019.12.31 06:00

於新蒲崗屹立42年的金寶冰廳,早前於區內連儂牆被人貼上「撐警」的文宣,95歲老闆及員工隨後更屢次遭到不知名人士指罵,冰廳一眾太子孫見事態嚴重,於是立即於網上發帖兼回巢打工,澄清冰廳上下從沒有發出「支持警隊」的言論。一直有參與罷市行動的他們,更聲言絕不割席,並表示在抗爭的同時,亦希望港人保護香港僅餘、有歷史價值的冰廳文化。

新蒲崗是傳統老區。1978年,二哥何楚華開業時便與爸爸何南泉一起打江山,開店前更走到區內鄰近茶餐廳「學師」,「由我出世、讀書到做餐廳,我老竇從來都無叫過我起身,第一次搖醒我,就係叫我起身返工。」如是者當年的小子就硬被捉往「勞改」,當年學師最主要的目的是要學懂沖一杯好喝的熱奶茶,「舊時出去學師好難學,因為老師傅唔會主動教你,每次沖奶茶就會用個身遮住,擔心教識徒弟無師傅,哈哈!」

上下都係黃 爺爺被屈「好失落」

二哥學滿師後落山,於冰廳沖出一杯又一杯奶茶,沖調了40多年,贏得街坊的青睞。三弟聽到二哥說起奶茶眉飛色舞,就忍不住插嘴表示,一杯熱奶茶的靈魂所在是茶膽,「現時我們用的茶葉分別是立頓、錦標及四號,茶葉比例就不說了,但亦有一個沖茶步驟尤關重要,就是撞茶。」

所謂撞茶,就是要將已煲滾的水將鐵壺內的茶葉撞散,透過水帶來的衝力,將茶葉內的味道一一釋出,三弟就指,冰廳多年來一直專注茶膽製作,「總共要將茶葉撞兩次共六輪,撞完一次之後焗,焗完後再撞茶,每次撞三輪,第二次再撞三輪,茶味就會出啦。」除此以外,食物方面亦毫不遜色,沙嗲牛肉麵看似簡單,但製作方法亦不馬虎,兩兄弟堅持每朝即炒鮮牛肉,冰廳出品的沙嗲牛肉入口嫩滑,更散發出陣陣洋葱味。

在金寶冰廳,除了吃到「香港味道」,亦會令人覺得置身於70至80年代的時光中,地上縱橫交錯的花磚、直紋掌櫃枱、柔和的白光燈,呷着那口熱奶茶,望着95歲老伯從容不迫地收錢,這種感覺買少見少,「試過想買返啲花磚補返爛咗嘅位㗎,但搵唔返,出面冇再推出啦!」三弟感慨說道。

逆權運動事到如今,不少餐廳先後加入不同政治立場,孫女Melissa表示,起初並未有想過餐廳會被捲入政治風波,甚至被人抹黑為「藍店」,指有餐廳員工發表撐警言論,「我哋餐廳上下都係『黃』,11月11日雖然我哋參與唔到罷市行動,但餐廳扣除成本後,將收益捐晒去畀星火同盟,95歲嘅爺爺亦相當支持我哋一班孫仔女喺餐廳貼文宣嘅事。」問到被抹黑一事,爺爺當刻的感受如何?孫女說:「我不知如何形容爺爺當時的眼神,但我見佢好失落,自己走出餐廳,其實佢一直知道點解有年輕人走出來,點解會有咁多聲音反對另一個立場,佢雖然好老但佢全部都知道。」另一位孫女Louisa然後指,爺爺是潮州人,性格比較固執,眼裏永遠容不下一粒沙子,「每次我哋將紙張放喺櫃枱,佢就會隨手扔落地下,但有一次,我哋要再捐錢畀星火,因此就寫咗一張好大嘅紙張放喺櫃枱旁邊,平時一定將紙張撕落嚟嘅爺爺,返到舖頭望一望張紙,就好乖咁放返喺度。」爺爺的表現雖未達至深黃,但所做的行為,其支持方式是由孫兒角度出發。

學茶記舊式運作 「其實好煩躁」

餐廳被人誤會一事,金孫們無償回巢幫手,亦令到餐廳第二代、60多歲的二哥開始思考,應否開始將冰廳交予下一代,「他們肯返嚟我當然開心啦,唔使煩惱點搵人,(會否擔心孫仔女唔會認真沖奶茶?)都唔會,但而家呢個世代就真係比較難請人,因為佢哋唔太注重茶水,好多茶葉公司好早就調配好茶葉份量。」每次問到餐廳主理人會否退下來,他們都有一個共通的「懷念樣」,「我哋冰廳以前就做工廠同街坊客多,而家就街坊客多,以前新蒲崗係工廠區好忙,放工時間人山人海,多人至睇唔到車,連車路都會俾人海遮住晒。」由於大多工廠往內地發展,機場搬了,冰廳生意一落千丈,為生意,餐單開始新增菜式,「當時四圍問人學師,又去圖書館睇廚書學煮嘢,好忙唔容易。」冰廳突然出現了一群年輕人,令不少顧客感到古怪,有部份曾於外面餐廳工作的孫兒均表示,起初回來幫忙時,都會感到相當不習慣,「一開始來到幫手其實好煩躁,收銀機又冇,計數又要慢慢計,入單時又要手寫、又要慢、廚房又要唔跟單嘅次序整食物。」一說起投訴,另一位「友誼大使」金孫立即前來「補飛」,「我哋餐廳員工大部份都係老人家夥計,你要佢哋學習新嘅一套,係有一定困難。」

屋企得一個 「呢度冇咗就冇咗」

現今世代很多事情都與金錢掛鈎,問到為何願意無償回巢幫忙,他們不約而同表示從來未有想過此等問題,「食嘅可以喺度食,住又有屋企。」記者起初質疑孫仔女們的動機,認為他們只是希望找到一個經濟避難所,或找個地方容身,但其中一位孫女卻說道:「唔係每個家都有個咁多年歷史嘅冰室(要守護),如果你係我哋,你會明白點解我哋願意無償返來幫手。錢可以再搵,但屋企只得一個!如果屋企有事,你搵幾多錢又點?呢度冇咗就係冇咗!」

果然好玩 籽在四方,即like「果籽」FB專頁!
BannerBanner