蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年11月13日

Big Spender:紅白男 買樓為打機

男士玩物養志,自有一套標準,就像這位40出頭的大男孩,30年來集滿一室電玩藏品,把虛擬世界搬到家中。常存在心的,是八九十年代電玩業的美好時光。甚至努力賺錢買樓,只為闢室獨享打機樂趣、擺放心愛藏品。如今,8-bit遊戲畫面的雲和山,對他來說,已像一杯咖啡,可堪細味。
記者:童傑
攝影:楊錦文、童傑

任天堂在1983年以尖端科技生產「紅白機」(Family Computer),成為大男孩之間的集體回憶,並且取得巨大成功,也引申出各式各樣的遊戲主機,為遊戲界揭開歷史一頁。1971年出生的林維(人稱大神),可說是與電玩時代一同長大。紅白機剛推出兩年,他正好中三畢業出來打工賺錢,滿足了他收藏心頭好的首要條件。「嗰個年頭,乜錢都好易搵,出嚟打工,每日做兩份,起初月入有三千幾蚊,扣咗一千蚊家用之後,留番五百蚊畀自己做使費,其餘嗰啲就用晒嚟買遊戲。1987年出咗PCE(PC Engine)之後,我買得仲多,諗番嗰陣菠蘿包都唔使一蚊個。」

主機+遊戲 總值60萬

我抱着滿腹好奇和疑惑,來到大神家中一探究竟,心中暗忖:小玩意到底會多到點嘅樣?開門內進,只見一室遊戲主機,數百盒紅白機遊戲帶更變成「牆紙」,密密麻麻不留空隙。據知,大神家中藏有3,000多盒遊戲,60多部主機,未計其他另類電玩收藏,保守估計總值達到60萬元,全是由網上或相熟的二手店訂購。3,000多盒遊戲當中,約有1,600盒是紅白機的原裝遊戲帶,其餘則是PlayStation及Dreamcast等主機的遊戲。屋內又有齊各大廠商的主機,單是紅白機已有約二十部,包括初版及紅白機仿製品等。部份主機僅於本港短期發售,極度罕有,例如初版紅白機,手掣採用四方膠粒設計,當年因有操控缺憾,於是回收再造,重新設計成今日廣泛應用的圓掣設計;「綠白機」則是國產山寨貨,大神也花了足足五年,才成功搜購收藏。
獨自賞玩,難免索然,於是他就曾經動用800多盒遊戲,走到旺角始創中心搭建「任天牆」作公開展覽,引發本港懷舊電玩風潮。雖然訪問當日,未及一睹「高牆」真貌,但鋪滿牆壁的數百盒遊戲帶,足已讓我悠然神往。睇真,機迷耳熟能詳的《龍珠》卡牌系列、太空戰士系列,以及價值上千元、深受追捧的《超級BB》都在牆上。「只差二百幾盒,就儲齊所有紅白機遊戲帶。」儲齊然後公諸同好,分享快樂,正是他的最大目標。

31年「大牛龜」仲玩到

跟一般收藏家不同的是,他的藏品全部「玩得」,並稱牆上的遊戲帶是「靈魂的驅殼」。「靈魂要有驅殼先完整,所以我唔會玩模擬器(EMU),要追求實在感,所以遊戲唔理新同舊,最緊要開得着,玩得到。」就如他最貴的電玩藏品,一部至少約值$30,000的14吋「大牛龜」紅白機電視「Famicom TV C1」依然能夠正常運作。這部紅色外殼、底部設有卡帶插口的遊戲機,早於1983年生產,具有31年歷史,對電玩迷來說,簡直是件dream toy。大神小心翼翼地打開遊戲機,電視畫面仍然相當清晰,「要有一部仲玩到嘅C1電視其實好難,曾經有朋友好唔容易搵到一部,點知喺日本運嚟期間搖壞咗。」不過講到金額,大神還有不少珍藏,例如至少約值$25,000的酒店用Famicom Box,還有約值$15,000的「超級任天堂電視」。這類藏品不但難找,而且早屬天價,要像大神般花數十萬元玩舊game,少點執着都辦不到。
男人講古仔,其實可以比女人更長氣,打機的男人尤甚。大神說慶幸自己生於香港黃金年代,真的遍地黃金,讓他有追夢的本錢,「唔使輸畀間屋」,「我20歲轉行做金行銷售,21歲已經可以供樓,畀到三成首期,喺黃大仙買咗一個$72萬嘅單位,剩低嘅閒錢都用晒嚟買遊戲。」他又笑言「上車」的動力,也全因「好想瘋狂打機」,「仲記得細個嗰陣,喺隔籬屋攞咗人哋一部黑白電視放喺睡房,嗰次係第一次有獨立嘅空間打機,之後我就同自己講,要盡快買樓,唔使俾屋企人打擾。」七年前,他又買下這個四百多平方呎的單位,收租數個月後決定收回自用,並與藏品一同遷入,成為我們眼前所見電玩迷的理想家園。
雖然與大神相差十載,但我對他的想法甚有共鳴。「人大咗,就覺得日日都係返工放工,人生唔應該淨係咁。」「我希望追番以前得唔到嘅快樂,以前玩翻版,今天買正版。」「我做咗金行經理好多年,見過最貴嘅鑽石,成粒五蚊銀咁大,價值兩億,等於幾十層樓,但我覺得不外如是,因為最緊要開心,我要紅白機就夠。」問到未婚的他,何時有另一半?他不敢說,但可肯定,陪伴他多年的電玩收藏,大男孩的浪漫,肯定能夠玩到老!

大神推介 死前必玩之作

紅白遊戲珍藏

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載