› 選擇地區
三藩市
紐約
洛杉磯
其他美國地區
香港 台灣 北美
 
2015年02月03日

Big Spender:Pao開一切好逍遙

懷舊迷玩車,僅是翻新噴油搵零件已是一項大工程,有心的,還會順道提升引擎氣喉。一直迷戀跑車飛街的沈盟皓(Leo),近年忽然愛上vintage風,由寶馬2002、Isetta到Pao,一直不停買、不停改,更在巨大的翻新過程中,連胎軨、懸掛也執意特別訂製,把家中幾部小跑車完全拋諸腦後。「年紀大,唔想再飛車,揸住Pao慢慢上山,睇吓日落,嗰種逍遙閒情,先至係香港人𠵱家最需要。」
記者:徐影龍
攝影:陳永威

Leo愛車,但與一般車迷不同的是,他對汽車的結構有深厚認識。然而,這卻為他帶來更多的煩惱。因為普通車迷只會更改包圍、內櫳,頂多加點豪華設備便了事,Leo則會對舊有的懸掛很不爽,對胎軨的尺寸及厚薄有要求,每次買舊車收藏,翻新改裝也是一項大工程。「好似啲熱血青年咁,八九十年代愛死日本大馬力跑車,亦係日系跑車最風光最多人玩嘅年代。自己換過好多車款,最夾最愛嘅,都係『飛雞』Silvia同『戰神』Skyline,個個講豐田AE86,我就偏偏鍾意日產出品,嗰種要力有力、要彎有彎嘅車身平衡,揮低唔少歐美靚車。」之後,他轉玩歐洲車,特別是操控性強的寶馬,曾擁有M3及Z4。近年人大了成熟了,Leo忽然對復古車款產生興趣,由四年前買入寶馬2002開始,便不斷追求vintage風格。「過咗一年,又買咗寶馬三輪小車Isetta 300,上年機緣巧合之下再買入日產嘅仿古小車Pao。𠵱家將所有心機都放咗喺Pao度,其他日系跑車已經好少打理。」

鐵加膠 噴油有難度

Pao是日產八九十年代的仿古三寶之一,其餘兩款為Be-1及Figaro。三者不但曾在日本掀起搶購熱潮,就連遠銷歐美,也是熱門車款。「雖然鍾意懷舊車款,不過想獨特一啲,所以揀咗一啲街上少見嘅型號,呢台一九八九年推出嘅Pao,產量只有幾萬部,喺香港好罕有。喺一次聚會裏頭,睇到朋友嘅Pao,覺得好可愛,大家傾咗成晚,車主見我係愛車之人,最後收咗九萬蚊,割愛讓出佢部Pao畀我。」
當年日產車廠銳意改革,特地找來車界外的設計師,打造了這台Pao。在傳統方形車身,換上圓邊設計,加上一雙大眼及車前護桿,集合了型格及可愛於一身,難怪當年那麼受歡迎。「Pao嘅設計師好大膽,採用咗好多革新設計,好似上下打開嘅尾箱門、引擎蓋同鬼面罩都用上膠料等,仲有電軟篷,整體嚟講好有個性。」雖是原裝直版,不過車身及內櫳稍為殘舊,於是Leo着手進行翻新。由於車身由金屬及膠料砌成,噴油時須找師傅分開微調,直至金屬及膠料的漆油順眼自然。內櫳皮料也是重新包覆,幸好車內膠邊、按掣也保存得很好,毋須費神找零件。「最後仲搵咗XPET訂造前後座嘅三重夾層地毯,踩落去軟綿綿,好舒服。」

特別倒模訂製懸掛

外表翻新花了差不多四個月,未算最辛苦,整個工程中,最難搞的是引擎及懸掛。「引擎、車底同氣喉,搵咗Spec-R嚟個徹底翻新,引擎表現仲算精神,花嘅功夫唔算多。最想搞又最麻煩嘅係將車身高度降低,問過相熟朋友,亦搵勻港日台嘅舊零件網頁,都搵唔到Pao用嘅短懸掛,越難就越愛,好想睇吓load低咗嘅Pao有幾酷。」最後,Leo認識了台灣MKB的老闆,承諾特別開模具,幫他度身訂製一套專用懸掛。首次安裝新懸掛後,出現刮砂板及噪音問題,要運回台灣修改。「前前後後一共改咗三次先滿意,真係好多謝佢對我咁有耐性。」
看到車身極為貼地的Pao,的確與別不同,更吸引的,是Leo加入自己喜好的美化改裝。「除咗喺車側加入仿木板裝飾之外,胎軨都係重點更改之一。首先將十二吋幼胎,換成飛達出品嘅168-45十五吋胎,輪圈都換咗著名輪圈廠Work嘅復古款式。唔夠喉,仲跟歐洲𠵱家流行嘅hellaflush玩法,加大咗offset位,等輪圈邊突出嚟,整體感覺更有個性。」
跟Leo相約在飛鵝山拍攝,我們從後跟着他的Pao,車仔細細兼且慢條斯理從容上山,到達山頂剛好迎來日落。斜陽金光灑在Leo及Pao的身上,眺望遼闊遠景,那種悠然自得,正是車迷花錢花心機的最大收穫。

Nissan Pao

出產年份:1989
引擎:987cc直四
馬力:52PS/6,000rpm
扭力:75Nm/3,600rpm
傳動:三速自動波箱

年紀大愛懷舊

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載