› 選擇地區
三藩市
紐約
洛杉磯
其他美國地區
香港 台灣 北美
 
2002年12月31日

汽車專題:
車書編輯現身推介 今年好車

今日就係2002年最後一日,各大汽車傳媒都已經選出今年最受車迷歡迎嘅車款,而結果亦已先後公布;但你哋又係咪好想知道,呢班對汽車咁有認識嘅車評人,心目中點睇佢哋嘅好車呢?今勻我哋《車天車地》版特別揀選咗九組車款,並經由本港多位資深車評人逐一選出心水;不如𠵱家就一齊嚟睇吓,由佢哋所揀選嘅車款,同你哋嘅心水車款係咪相同啦!

記者:Mark哥

級別:家庭房車
豐田Corolla
Facelifted新版更吸引
點睇部車: 新版豐田Corolla外形大方得體,車廂空間又見闊落,而Facelifted新版更改善咗響彎路上嘅操控表現,令乘坐及駕駛舒適性提升不少,再加上齊全車廂設備,就連享受程度亦有所提升呢!

評選人: 狄港生
《Mr.Car》雜誌社長

級別:城市小車
福特Fiesta
新波箱配搭好玩
點睇部車: 新近抵港嘅福特Fiesta,一套能以手動或自動模式操作嘅5前速DurashiftEST波箱,比傳統波箱除為你帶來更多駕駛樂趣及方便外,而且重係德國製造,品質自然有保證,而相宜嘅售價亦係賣點之一。

評選人: 戴年駿
《AnyCar》雜誌總編輯

級別:RV
萬事得Premacy2.0
空間性能 皆提升
點睇部車: 不願上鏡嘅Kenneth認為,Premacy2.0車廂空間及性能表現都較前有所提升,予人有耳目一新之感,輕巧車身設計亦方便穿梭鬧市嘅橫街窄巷;不過,最吸引當然係相宜嘅售價啦!

評選人: 梁國健
《武剛車紀》雜誌總編輯

級別:轎跑車
平治CLK
售價好吸引
點睇部車: 喺芸芸Coupe轎跑車之中,新款平治CLK實在來得十分吸引,因為新車不但樣靚,而且重備有多項先進電子配備,同埋出色操控表現,加上較舊有型號來得吸引嘅售價,難怪會有不少車迷俾佢迷倒啦!


級別:日本中型轎車
萬事得Mazda6
輕巧靈活夠好玩
點睇部車: 因萬事得廠方想研製一部富駕駛樂趣嘅汽車,而推出嘅全新Mazda6,不但外形吸引,輕巧靈活嘅操控表現,同埋紮實車架結構,都令人對其留有深刻印象,當然乘坐舒適感亦見不俗啦!


級別:歐洲中型轎車
平治C-Class
新偈反應敏捷爽快
點睇部車: 新C-Class形象高貴得嚟,又較上一代來得年輕;而個人認為一台新加入、並用於C200Kompressor型號嘅1.8公升機械增壓引擎,除有敏捷反應外,而且重有慳油嘅特性,吸引嘅售價亦為其增添多一份吸引力。


級別:開篷跑車
大發Copen
K-Car群中 罕有開篷車
點睇部車: 大發Copen響K-Car群中可謂係絕無僅有嘅開篷車,除令車迷有更多選擇之餘,佢所配用嘅硬摺頂亦係賣點之一;重有就係此車操控表現,比起其他同級K-Car來得出色,因而予人留有深刻印象。


級別:MPV
日產Elgrand
賣相有型煞食
點睇部車: 新版日產Elgrand響眾多MPV當中,能夠脫穎而出成為心水車款,相信同佢嗰個極富前衞感嘅賣相有莫大關係;而一套先進嘅智能式巡航系統,亦能有助增強行車安全性。

級別:豪華轎車
凌志LS430
乘坐舒適度高
點睇部車: Edmond表示,豪華房車嘅首要條件係要有高乘坐感,操控性或其他地方反而係其次;而選擇LS430係因為此車行車時十分寧靜,唔會有太大噪音傳入車廂,懸掛設定亦適合香港路面。同時佢又認為歐洲豪華房車,較適合如外國一樣鋪設得較好嘅高速公路,所以若在本港行駛,LS430可算係理想嘅車種。

評選人: 劉偉華
《人車誌》雜誌總編輯

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載