› 選擇地區
三藩市
紐約
洛杉磯
其他美國地區
香港 台灣 北美
 
2006年10月10日

車人合一:要打靚8字 先學原地轉

喺啱啱過去嘅周末,珠海賽車場傳來陣陣輪胎嘶叫聲及觀眾喝采聲,點解會咁?原來係由TypeRClub舉辦嘅TrackDay,邀請到日本飄移車神織戶學,親身到來為大家表演飄移。如此難得,我哋當然絕不放過跟他作簡短訪問嘅機會,他還說:「要打靚8字,先要學識原地轉!」
記者、攝影:丹尼斯

曾出戰東望洋 勇奪亞軍

現年38歲嘅織戶學,無論喺飄移定還是喺賽道上作賽,都可以話係好有天份;打從1990年,首次參加賽車比賽嘅一刻開始,就已經跟三甲位置結下不解之緣,同時又成為咗全日本D1飄移大賽嘅評審員,可見佢嘅表現係幾咁出色;不過,喺佢多年參賽生涯入面,最令我記憶猶新嘅,相信會係2001年曾經出戰澳門東望洋大賽,當年憑着一部ToyotaAltezza戰車,不但力壓份屬同鄉嘅谷口信輝,而且仲勇奪亞軍寶座,至今相隔五年,問他當時嘅感受如何,他還謙虛地說:「只是好運罷了!」
而喺今次TrackDay活動中,織戶學除咗夥同本港著名飄移車手James和Wing,為觀眾表演超卓嘅飄移技術外,也曾試揸一部參加TrackDay嘅大改NissanSkylineGT-R,並創下1分43秒6嘅最快圈速紀錄!

大讚香港車手 進步神速

當織戶學被問及如果要好似佢咁可以圍住兩部車打8字,他答道:「先要學懂原地轉,懂得利用油門去控制車速同埋角度,跟住再循序漸進學習利用手掣及離合器等等去控制部車,同時還要學識視線轉移,視線要望遠啲,例如入彎前要望彎心嗰點,到彎心嗰陣又要望住出彎嗰點,學識之後包你玩得事半功倍。」佢更補充話要練成出色的飄移技術,絕對不能操之過急,同時最好跟一班志同道合嘅人交流吓心得,從而改善自己嘅技術。
至於香港車手嘅表現,佢又覺得點呢?「唔……我好欣賞James同Wing,佢哋兩個喺香港呢個咁細せ又缺乏練習場地嘅地方,都可以有咁出色嘅飄移技術,實在值得嘉許,而且佢哋兩個經常好落力咁練習,同埋好肯接受人哋嘅意見,比以前明顯進步咗好多!」咦,呢番說話如果俾James同Wing聽到,一定好開心!

港澳飄移車手 點睇織戶學

織戶學呢位來自日本嘅飄移車神,憑住出眾嘅飄移技術,廣受港澳兩地嘅Fans歡迎,不如睇吓兩地嘅著名飄移車手,又點睇呢位飄移車神吖!

香港車手James:佢好樂意教導後輩

「佢嘅飄移技術好超班,而且又好樂意教導後輩,例如坐喺我車上時會指出我喺飄移時所犯嘅錯誤,並從旁指導及示範,連我哋戰車嘅Setting啱唔啱都講埋,因而令我嘅技術得以改進。」

香港車手Wing:教識我唔少技術

「我玩飄移已經有6、7年,也曾用過S13及SkylineGT-T等車款做戰車,初時玩得唔係太好,但四年前跟織戶學去學習飄移後,明顯玩得好好多,因為佢會教你不同嘅招數(例如視線轉移),等你可以玩得更好。」

澳門車手峰:值得後輩學習

「早前我喺上海舉行嘅飄移大賽中入到八強,實在好開心,而今次織戶學嚟到珠海參加TrackDay,更可以畀機會大家交流飄移心得,並喺我練習期間坐在旁邊作出指導,而佢嗰種樂於教人嘅精神,亦好值得學習。」

經典超級跑車 TrackDay大晒冷
FerrariF50車主Tom:好Enjoy今次活動

部份參加今次TrackDay活動嘅車款,係屬於經典跑車款式,其中Tom所揸嘅限量版FerrariF50,就係其中之一:「我今次揸F50嚟珠海參加TrackDay嘅主要原因,除咗係近自己Office之外,最緊要係可以試試部車發揮最大功效時嘅感覺,無論係喺國內嘅公路以合法車速行駛,又或者喺賽道上飛馳,感覺都係一流!

Ferrari360CS車主Peter:可盡情發揮

來自澳洲、並已經喺香港生活多年嘅Peter,所揸嘅係Ferrari360CS(ChallengeStradale):「以前喺澳洲生活嗰陣,我曾經參加過唔同類型嘅賽事,但嚟咗香港後就幾乎無再參加賽車活動;所以能夠參加今次TrackDay,不但可以俾我重拾當年喺賽道上比賽嘅感覺,仲可以盡情發揮部車嘅威力!」

FordGT車主Ken:揸住佢有高收視

今次TrackDay最矚目嘅車款,肯定係Ken所揸嘅呢部FordGT:「揸住呢部咁經典嘅跑車,無論喺公路定還是喺賽道上,都可以有高收視,因為部車嘅外形好有男性嘅剛強味道外,而且佢仲係全球限量生產嘅型號嚟㖭;另外,我覺得今次活動舉行得唔錯,好讓我哋一班車主,可以揸住自己部愛驅喺賽道上飛馳,正!」

現場花絮

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載