› 選擇地區
三藩市
紐約
洛杉磯
其他美國地區
香港 台灣 北美
 
2007年11月27日

LANCEREvoX首配雙極力子
自動波快過棍波

今屆東京車展,兩大日系死對頭拼個你死我活;日產GT-R鋒芒盡露,宿敵三菱亦以第十代Evo正面硬撼。車展未完,已有手波版水貨搶閘到港,以為要等一輪先可再過Evo癮,話咁快半自動波版又殺到。你知唔知三菱首次登場嘅雙極力子波箱有幾巴閉?其「入定波等你轉」嘅概念,轉波速度隨時快過東望洋冠軍車手!

文:法拉李
攝影:陳偉強
Model:Ruby@BXMedia

入定波等你轉

早前我們已報道過EvoX外形大改及全新4B11MIVECTurbo引擎之特色,今日呢款半自動波版最大賣點就係三菱首個TwinCluthSST6前速+/-波箱,採用雙離合器設計,第一組離合器負責一、三、五及後波;第二組則負責二、四、六波段,運作概念為當你入一波起步時,第二組離合器已扣着二波Standby(但不會咬着齒輪,所以冇動力),所以彈指間便能呼應駕駛者入二波之需要,當你入了二波後,另一組離合器又會自動扣着三波,餘此類推。所以轉波過程相當敏捷,兼且順滑無瑕,整個過程天衣無縫,人手入波根本唔夠佢快,可謂完全打破自動波反應慢之定律。在試車前從未諗過三菱可以做出咁好嘅波箱,值得一讚!
降檔拖波時電腦會自動補油,而且密齒比波箱轉波順滑,相信可以慳返唔少油錢。

引擎強勁 內櫳一般

4B11MIVECTurbo引擎運作暢順富線性,唔覺有TurboLag。Turbo加MIVEC亦令引擎力量平均分配到每個轉速,在任何一個波段都俾到你強勁加速感。新引擎在3,500rpm發揮43.0kgm扭力,嗰種加速力令你背脊無可能離開椅背!
轉款後車身大一個碼,霸氣十足,好睇與否見仁見智,但我偏愛它紅襯黑,若跟車的18吋BBS合金軨改為黑色就更正!不過內櫳就要彈吓,除Recaro桶椅外,其他設備全部熟口熟面,差啲分唔出新舊有咩唔同。前排視野開揚,駕駛者亦可輕易調校出合適嘅坐姿。行李箱容量亦是一般,甚至有人可能會覺得細唔夠用,尾箱蓋亦給人過重的感覺。不過買得高性能跑車,都未必會介意呢啲小問題。

四驅系統 盡情入彎

在公路行車時感覺到車架剛性提升不少,行車舒適,雜音少,路噪胎噪亦很少,有別其他高性能跑車。當你轉用+/-及SuperSport模式後,EvoX好像完全被釋放出來;彎前一腳重Barke後用撥片連降兩檔,入彎的一刻像完全被扯入彎心,沒有轉向不足。放心盡油出彎,不需一秒車子便完成出彎動作;相信四驅系統在彎中擔起重要角色,令車身及四個輪胎好似行路軌一樣不偏不倚。
不得不提新加的S-AWC電子設備。S-AWC系統將ACD、AYC、ABS及ASC統一管理,令車身在任何時候都保持穩定。當電腦感應到將發生轉向不足時,系統會增加後輪的動力分佈;令車身不致脫離原有軌迹。S-AWC亦能令你在彎中能夠提早加油,有幾多去幾多,完全挑戰你嘅膽量。

供款計算機

首期:$49,800
利率:6%
每月供款:$11,579(48期)
註:以上數據僅供參考

規格

引擎:1,998c.c.直4DOHC配Turbo
馬力:280hp/6,500rpm
扭力:43.0kgm/3,500rpm
傳動:6前速+/-波、四輪驅動
查詢:環宇汽車(25200636)

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載