› 選擇地區
三藩市
紐約
洛杉磯
其他美國地區
香港 台灣 北美
 
2008年10月01日

轆Book:小巧Mazda2劈得起

有無搞錯?可愛車仔Mazda2Freeway都可以狠劈?全對!唔使懷疑。Mazda2車仔細細易操控,今Day就嚟個長期測試,狠踩油、掟急彎,仲要搶位過線……測試結果有驚喜,估佢唔到咁慳油。

記者:黎頌詩
攝影:楊錦文
模特兒:阿草

爆住去左穿右插

我諗,車嘅表現,有時會因駕駛者態度唔同而出現好大差異,今次喺Mazda2Freeway身上,我Feel到呢點。
有過幾次揸Mazda2Freeway經驗,上車踩油用作日常代步,由始至終,佢都表現得溫馴易駕馭,叫人得心應手毫無壓力。直至嗰日,載住同事辣手龍,出事嘞。辣手龍話:「咪睇小呢部車仔,查實佢好劈得㗎。」我悠悠閒揸車,佢就眼睥睥,表情擺明有啲按捺不住。我醒目,讓位畀佢露兩手。佢揸實軚盤,深踏油門,車仔即時轉性,渾身是勁向前衝,推背感當然無佢份,但澎湃力量感仍然夠我過足癮。
睇住錶板,辣手龍一下子推進到時速100公里,加速順暢,兼發揮到小巧靈活本色,公路上搶住上,左穿右插,估唔到一直溫馴可愛嘅Mazda2Freeway竟然可以咁兇狠。無諗過嘅突煞急煞車都測試埋,話說辣手龍車手上身之際,突然間近距離出現一部大車,佢迅速踩Brake,明顯感到4W-ABS煞車系統即時發揮功能,唔使慌亂,制動能力絕對可以信賴,即時又可以氣定神閒,加速前進。興奮過後先發現,我一直低估咗1.5公升引擎推動輕巧車身嘅潛在威力,事實上,新一代Mazda2引擎經重新調校,輸出比以前更強,103匹貨仔,原來都可以好玩得。

Hea住揸泊位Easy

辣手龍畀番個位我繼續試車,我女人仔一個,車於我,始終係代步工具而已,舒適實用最重要,故意走一趟長途,Hea住揸,最能摸清Mazda2Freeway表現。
由將軍澳入西貢再轉沙田出荃灣入屯門,由東到西遊勻新界九龍。大長途,先講乘坐感,車仔細細嘅Mazda2Freeway,內櫳空間感頗不俗,坐仿桶座椅手握三幅式真皮軚環,些少跑味令我揸小車都揸得特別醒神。中控台造型可愛、簡潔易用,視覺享受加輕鬆駕馭,都算係種行車樂趣。沿途刻意Keep住D波行車,Mazda2Freeway溫柔個性返晒嚟。將軍澳上西貢嘅一段長斜路,係第一個挑戰,雖然只坐兩人,但D波上斜力量感未算強,日常用小車格局咁啦,起步同加速流暢,永唔會失驚無神嚇你一跳。不過當我以為有本事食住佢大膽嚟次高速掟彎,車身就明顯有點飄,當然,正常情況下,入彎收油先係良好駕駛態度嘛!都係自己唔啱。
令我最有自信就梗係泊位嗰陣啦,超窄停車場都無有怕,一手L位,從未如此威過!連辣手龍都讚我叻。行足幾個鐘,睇睇油缸讀數,驚喜!存量顯示只係稍微下降,慳埋荷包,又贏多瓣。

Mazda2Freeway規格

引擎:1,498cc直4DOHC
馬力:103ps/6,000rpm
扭力:14.0kgm/4,000rpm
傳動:4前速自動波
車價:$131,990
查詢:萬事得汽車(28931112)

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載