› 選擇地區
三藩市
紐約
洛杉磯
其他美國地區
香港 台灣 北美
 
2009年04月12日

轆Book:首部環保汽油SUV夠照

Murano,意大利琉璃工藝,舉世知名;Green,即時想到的,講環保。MuranoGreen,好似「美點雙輝」,拼出日產新車,設計理念係SculptureinMotion,主打賣點「全港首部環保汽油SUV」,玩藝術、領潮流。唔識藝術嘅我就一樣Buy環保,因為潛台詞=慳錢!點知第一眼望MuranoGreen,即時發現藝術果然「夠照」!點照?睇頭燈!

記者:梁美甜
攝影:王文忠
模特兒:Ayu
特別嘉賓:Shadow

點解咁照?

頭燈組係一排多個立體射燈向前推展,似唔似Sculpture?有無藝術味就見仁見智,個人就覺得夠靚夠搶仲好夠照!

慳玩性能四驅

MuranoGreen打正「全港首部環保汽油SUV」旗號,有幾環保?簡單啲,政府準則,過兩關:低排廢、低耗油。或者可以咁睇,以現今乜都用金錢衡量嘅世代,側重實際層面嘅使錢藝術,政府「照」如車頭射燈般有力夠撐,扑槌買即時慳$33,200首次登記稅至實在,有幾藝術同點環保反而係Bonus!
其實同系3.5L型號早喺去年10月引入,部車豪華又好玩,車價約44萬,直逼豪華MPV。不過香港人普遍要求:「付出少少得益多多」,咁今日MuranoGreen又似乎另有搶客本事!全新四驅MuranoGreen以2.5公升偈為動力核心,搭配XTRONICCVT波箱,廠方數據約$1.2/km,加上慳油波箱更加入全新ASC智能系統,系統能根據駕駛者習慣以及路面環境而自行調節控制轉波時間,更能有效控制燃油效益以及提升整體性能,慳家又性能兼具,好玩又乘載量大!

狂試入彎

呢日唔覺意見到狗狗Shadow,超級怕狗如我都被軟柔長毛所征服,就以Murano帶埋佢出動,齊齊呼吸新鮮空氣。可惜MuranoGreen唔似3.5版有個大天窗同行李架,我同Shadow唔可以一抬頭就同藍天打氣。幸好,車身高車廂大,單係尾廂都有402L容積,摺埋後排容積升至838L,任Shadow點跳點舞都得!
MuranoGreen一如3.5版本,仿跑車線條以及誇而獨特車頭設計及鬼面罩、漆油自動修補功能、引擎環保慳家、配備多個電子功能系統、智能四驅系統AllMode4×4-i等等。不過見佢車身高,心諗轉彎時BodyRoll應該相應更大。以4、50km/h入彎,無事;6、70km/h再跑幾轉,又得!好,提升至7、80km/h入彎……結果係傾側度唔係太明顯兼夾指向性高,就連車尾都無太多左右甩等多餘動作,佩服囉!

有感而發環保=$?

無疑,講到揸車+環保,一般人都離不開只考慮到一個字:錢!大家着眼點都係「慳到幾多稅?慳到幾多油?」我就覺得,大家唔好忽略,義務與責任都好重要,環保唔係建基於人哋畀優惠,同少使幾多錢。自覺啲,出部環保車慳油慳錢之餘,學吓慳油揸車法、着重保養等都唔少得。想要更好嘅生態環境,駕駛者都好應該出心出力。

1.內裝簡潔得嚟有強烈時尚感。

2.儀錶板猶如飛機起動般,每次啟動,都會像掃描般先運轉一次。

3.車尾設計歐洲味濃,源自Murano熱捧美國市場之故。

4.具有全新智能四驅AllMode4x4-i功能,行市區、Off-road都掂!

5.採用曾奪得十大引擎獎嘅QR25DE引擎。

6.行李廂設按鈕,一拉、一按,後排座椅自動摺合或回位。

7.車尾及盲點有視泊系統幫你睇真啲。

8.後排空間十足,惟車身高,老人細路上落較吃力。

9.單係行李廂已有402L容積,同Shadow去野餐都得。

NissanMuranoGreen規格

引擎:2,488c.c.直四
馬力:170ps/5,600rpm
扭力:25.0kgm/3,900rpm
傳動:XTRONICCVT
售價:$316,800
查詢:合誠汽車(22621088)

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載