› 選擇地區
三藩市
紐約
洛杉磯
其他美國地區
香港 台灣 北美
 
2009年08月01日

法定貨幣不能拒收

早排講過搭的士畀錢有價講嘅問題,行家「醫咳Baby」睇完話自己好均真,點都無情講,唔會無喇喇平十幾蚊畀人,費事做壞規矩,「個錶幾多就收幾多,唔會收貴亦唔會畀折。好似上個禮拜咁,又係載住個靚女,去到目的地話得張五百蚊紙,我啱啱先開工,邊有得找呀?佢話落地㩒機,咁梗係要佢擺低張身份證穩陣啦,點知靚女企硬唔制,僵持咗幾分鐘都係算數,放佢去㩒機。大佬,分分鐘走咗去血本無歸o架!」聽落有道理,但「醫咳Baby」嘅諗法實在好老套,堂堂靚女點會呃你一百幾十蚊的士吖,係你自己唔肯收張大牛咋喎,叫人擺低身份證好唔尊重啫。拗都拗咗幾分鐘,又阻住自己做生意,大牛係法定貨幣無得拒收,若然激嬲人報埋警,你話邊個蝕底嘞,揸車搵食點可能咁唔識轉軚o架。不過作為的士佬,我都希望乘客體諒,盡量唔好畀大紙啦。

文:黃師傅

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載