› 選擇地區
三藩市
紐約
洛杉磯
其他美國地區
香港 台灣 北美
 
2009年09月27日

戒奶嘴8招 貝安琪學神變車神

自從貝安琪半裸行Show火併椋名凜後,性感形象迅速勾住各大港男的心,最近仲的起心肝學車,唔使下下靠護花使者接送。雖然香港地車多路窄,駕駛難度比老家德國肯定高10倍,不過有教車高手鍾Sir醒佢實用8招,新手學神都立即變老練車神。

記者:徐影龍
攝影:林栢鈞
鳴謝:香港駕駛學院

坐波子大

問Ankie成功考到牌後,第一架會買乜車?「我已諗定Toyota嘅Prius,個樣幾靚,坐得又舒服,最緊要係環保車,有意義。至於未來DreamCar,我會買保時捷Cayenne,事關自細坐住爸爸媽媽嘅Carrera,喺德國紐堡林走過好多路,特別有感情。暫時所見,香港人揸車當然不及歐洲人咁有風度,不過都尚算斯文同禮讓,反而法國人揸車比香港人無禮貌得多。」

好哋哋喺德國唔考牌,偏偏嚟到車多路窄嘅香港先嚟做學神,不過見到貝安琪(AnkieBeilke)一臉大無畏表情,原來背後有高人指點。「我覺得有個專用場嚟練習會好得多,起碼唔會失驚無神有架大車Cut我線,又或失魂路人衝出馬路,令我可以專心熟習操控。最鍾意玩模擬駕駛,好似真係考緊試咁,令我早啲適應到考牌壓力,及格率一定高好多。」練好基本功,再學埋香港駕駛學院首席發展主任鍾Sir今日傳授嗰8式秘技,車牌肯定手到拿來。

第1式 揀車唔好貪得意

好多人考到牌第一件事就係想出架靚車,性能強勁嘅車當然唔適合新牌仔,不過鍾Sir特別提醒,可愛小車都唔係個個啱,「家好興Cutie細車,不過通常車頂較低,A柱又粗又斜,可能會阻礙某啲人嘅視野角度,尤其轉右彎時會遮得最嚴重,對新牌仔嚟講變成多一重考驗。」

第2式 要識Kill標

鍾Sir話新牌仔第一樣犯嘅係唔熟學車路線以外嘅交通標誌。除咗努力刨熟《道路安全守則》,主動留意路面標誌都好重要,見多啲記多啲。鍾Sir補充:「揸車望遠啲永遠係不變守則,好多新牌仔不自覺跟車太貼,遇着五噸半、巴士等大車,就會擋晒視線,睇唔到路牌。」

第3式 壞車勿留車內

學神考到牌後總有機會有人生第一次上高速嘅體驗,Keep行中線,仲要小心滙合處,好多車Cut出Cut入,若揀錯線都寧願繼續行錯,千祈唔好夾硬Cut番轉頭。「如果遇上壞車,安全情況下,喺100米外擺個警示標誌,司機同乘客就企上路壆或中間分隔界,勿留車內。」

第4式 拗彎小心扭親腰

幾乎新牌仔都遇過嘅,首推停車場「簽名留念」,唔少停車場嘅出入同轉彎都係新牌仔危險位,要識偷位轉彎,如轉右就先向左扭啲軚,入彎會順得多。「新牌仔又會經常以為車頭入到就無事,其實要車腰過埋先叫安全。仲有某啲停車場地下有層光油,落雨時好跣,要小心。」

第5式 水撥雨傘成障礙

天雨路滑又係危機重重,除咗保持胎紋深度、視線望遠啲、行車距離由2秒增加至4秒呢啲例牌嘢外,對外界嘅警覺性亦要特別提高,「惡劣天氣會容易出現一啲莽撞行為,如路人會心急過馬路,雨傘又擋住視線,同樣地,水撥亦會減低司機嘅警覺性,即係人及車都要打醒十二分精神,唔好靠估。」

第6式 環保揸車技巧

唔係講笑,揸車都有環保技巧,例如臨近燈位,可以早啲收油慢溜停車,唔使衝到埋去再急踩Brake,做成多餘嘅動力浪費。鍾Sir仲教要識睇轉數錶,「每一架車咩轉數出最大扭力都唔同,可以睇番車主手冊知道扭力峯值喺邊,唔係一味踩大油升轉數就叫好力,過咗最高扭力嘅都係嘥,當然拖低波落斜就例外。」

第7式 夜晚留神路牌同線位

試過大白天去啲新市鎮泊低架車,夜晚玩完攞番架車時,居然迷路唔識走,「夜晚認路一定係差啲嘅,尤其係陌生嘅地區,除咗留神路牌及線位外,都係靠頭燈幫你睇清條路,適當時候就要開高燈喇。」

第8式 企圖醉駕一樣犯法

唔使講都知,飲咗酒就唔好揸車,累己累人。點知鍾Sir補充,原來唔揸車都犯法,「飲大咗,企圖駕駛或掌管車輛,都有機會觸犯法例。簡單講即係飲大兩杯,企喺架車隔籬又持有車匙,附近又無其他人嘅話,差人就有機會作出檢控。就算諗住上車攞嘢,都係搵朋友代勞好啲。」

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載