蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年02月16日

拜車公:5am前11am後 誠心拜車公

新一代思想開放,初三赤口唔拜年?無人理啦!不過拜車公嘅習俗,男女老幼依然風雨也不改,咁神心,無非都係想新一年順境。拜神就當然要做足功夫唔馬虎,昇龍師傅就千叮萬囑,轉風車要順轉,再帶個大風車返屋企吹多兩吹,就全年順境無甩轆啦!

記者:許維雅
攝影:陳陶鈞
Model:Sam@Puremodels、CC
鳴謝:華人廟宇委員會、昇龍師傅

準備篇
香燭衣寶有學問

希望得到車公保佑新一年心想事成,新正頭開個靚運,當然唔係人去你又去湊熱鬧咁簡單,求祈亂拜就不如唔好去喇!因為拜神都有學問,正如今日教大家拜車公嘅玄學顧問昇龍師傅所講,要做足全套做得正規都有學問,好似一大堆五顏六色嘅衣寶係乜,師傅逐張解釋都搞到我頭昏腦脹。所以都係叫師傅教路,等我哋嘅事前功夫都唔馬虎,因為做錯等於無拜過o架!

1.車公衣寶唔少得

傳統拜車公要準備三牲(現代人一般用豬、雞及魚)、四果(蘋果、橙、提子及蕉)、祭酒、糖果、香燭及車公衣寶,不過今日萬人空巷,太多祭品不但論盡,亦根本好難搵地方放祭品,所以一份足料嘅車公衣寶就最緊要喇。大家可以事前到香燭舖買定一份車公衣寶,當中包括車公衣、百貴人、長祿貴人、富貴袋及百解等,其實班香燭舖大哥大姐會識幫你執。想再多花心思表誠意嘅話,不妨加添一些元寶,千祈唔好執漏三支大香及一紮細香呀。

2.針對所求一擊即中

要分得再仔細點及有清晰目標嘅話,其實可以加多份針對所求嘅衣寶,好似求學業用文昌衣寶、求財運用財神衣寶、求健康用平安衣寶等。

3.立體車公卡多一份庇佑

若然唔夠時間準備,去到車公廟都一樣有得買,一份份執好晒不同大細嘅車公衣寶套裝,價錢由$28至$88不等,買平買貴就隨心意便可。於車公廟買嘅,會附送一張全新推出嘅立體車公卡,拜完神可留作保平安,唔想要嘅話,衣寶套裝可以減$20。

行動篇
拜神有序 須轉風車

買了衣寶準備出發,謹記以下步驟,睇清楚貼士,拜神順利有個好開始,自然新一年都可以順順利利啦!

1.入廟前買定風車

準備好香燭衣寶都好,入廟前記住買定個大風車,昇龍師傅教路:「拜完神,拎個風車喺啲香火上面轉幾個轉,可以消除雜氣吸靈氣。」廟內有不同大小、不同款式嘅風車售賣,最貴嘅要$888,有成個人咁高,最平就$20有交易,五顏六色個個吸引,我就最鍾意全金色嘅大風車,夠晒耀眼。

2.姓甚名誰寫清楚

點香前有三件事一定要做,第一當然係洗手以表尊重,第二就係將衣寶一張張分開,叠埋一大堆嘅話,根本化唔到,最後就係要寫清楚姓名、出生日期(最好寫農曆啦)及地址於百解衣之上,等車公知道你係邊個同求咩。

3.點香有人幫手

兩旁設有點香區,大班工作人員會幫手點香,不過就要添香油,$10、$20隨心便可。唔想逼埋去排隊嘅人會自己帶火機點,但為安全起見,廟內不可自行生火點香。

4.上香留三支

點完香可以去正殿前嘅香爐區上香,先上三支大香,最正確嘅方法係放於額前嘅正中位,拜三下。跟住誠心對車公講你係邊個、想求甚麼、年尾會來還神等說話,跟住再在其他香爐各上三支細香,記住留三支帶入正殿先上。可將自己買嘅風車於香爐上順時針轉三個圈沾靈氣,昇龍師傅提醒大家:「按照今年流年,風車帶返屋企放喺今年最旺嘅西北位最好。」

5.轉風車要順時針

至於最後指定動作梗係打天鼓報到、轉風車改運,唔少人認為轉風車係往年好運就順時針轉;相反黑仔就要逆時針轉。不過昇龍師傅卻有另一番見解:「拜神祭祀永遠只會向順時針嘅方向做,我建議大家轉風車都係順時針較好,取其新一年順風順水嘅意頭,逆時針始終有點不順之感。」

6.求籤化寶隨心

基於環保,車公廟唔會畀你自行化寶,廟內設有聚寶車,善信只要將車公衣同元寶放入去,職員自會代勞。唔放心嘅話,自己帶返屋企化都得。求籤當然都係隨心,師傅話無特別事要問就可以唔求。想求籤嘅話,要去解籤處借籤筒,請準備按金$20。$5換一張籤紙,想有人解說嘅話,$10解一支籤。

紀念品推介

Check清楚
記住好時辰

拜車公唔同上頭炷香,唔使鬥快,今日最佳嘅拜神時辰係今早5時前及早上11時至下午5時。當然以上香時間為準啦,所以記住預計排隊入廟及點香時間,因為年年警察都會封路控制人流搞到大排長龍,小心錯過好時辰呀!

搭車揸車認清地點

搭車去嘅,當然係港鐵最方便,記住於大圍站落車,唔係車公廟站呀,大圍站B出口出發,最快約5分鐘左右即到。揸車去嘅話,廟隔籬嘅咪錶位到時應該封晒,最近都要去到愉景花園旁邊,不過只有數個車位,應該有排等喇!其次大家可以考慮大圍站旁有個露天停車場,每小時$7,希望今日唔會坐地起價啦!廟對面嘅新翠邨停車場就肯定鐵價不二,每小時$13,行去廟大概5至10分鐘左右。

車公廟今日開放時間:
昨晚開始通宵開放至今日(2月16日/初三)下午5時30分

車公通識

據說明末崇禎年間,新界各地疫症肆虐,後有人查史書發現宋朝有位車大元帥,除了平亂有功,更能遏止疫症。沙田村民於是請人打造車大元帥像,在沙田建車公廟,疫症果然立刻受控。村民為感激神靈,便定下每年車公誕拜祭車公嘅習俗。不過車公誕其實唔係年初三,而係年初二,之不過後來好多人認為初三係赤口,不宜拜年,大家就於年初三拜車公,因而慢慢變成習俗。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載