› 選擇地區
三藩市
紐約
洛杉磯
其他美國地區
香港 台灣 北美
 
2010年05月20日

富豪C30 換臉保童顏

■頭燈、泵把、鬼面罩都大革新的C30,形象更年輕,對搶攻車仔市場更有利。

整容風氣普及,鼻幾高、面幾尖、唇幾厚由自己話晒事,中女想擁有一臉童顏真係話都無咁易。一向走年輕路線的VOLVOC30,為力保青春,亦加入整容行列,2010年以全新臉孔示人,Facelift版塊面仔尖咗、眼仔大咗、嘴仔靚咗,仲整多咗兩個酒渦喺面頰,搞到成日好似笑咪咪咁,令童顏多添幾分生氣,越老越「年輕」。

記者:許維雅
攝影:譚盈傑
Model:Sukmi

哈哈笑鬼面罩添生氣

瑞典老牌VOLVO被中國吉利收購已成事實,有咩改變暫時未知,但肯定車系繼續年輕化一洗老成形象。近年VOLVO最成功脫胎換骨必定係揭背車仔C30,於07年重新包裝後已年輕不少,以長闊高只有4,252×1,782×1,447mm的細小車身主攻年輕人市場。要緊貼不停求變的年輕人步伐,最新到港的C302.0決定再換臉。
今次Facelift版以車頭改動為主,棄走過往感覺單調的長方形設計組合,換上全新5點式哈哈笑鬼面罩,蜂巢圖案配大圓形車章,感覺煥然一新,配合下面呈梯形擾流器,呢個大嘴巴組合令整塊面形更尖,加上頭燈改用前尖後圓設計,一對眼仔微微上揚,令車頭充滿動感氣勢。最後兩角落的霧燈係畫龍點睛所在,新霧燈框的形態如面頰上的酒渦,為C30的面貌帶來更多的生氣。

$1.15/km油耗 慳荷包

一向幾鍾意C30車尾品字形的圓渾線條、全玻璃尾門,如此鮮明易記設計當然唔會輕易剔除,所以Facelift版亦只係改動了尾泵把作配襯,由以往的黑膠泵把換上金屬泵把,由上而下連住落一幅過的車尾,視覺上帶來更貼地效果。梯形的凹凸設計不但強化車尾立體感,更可呼應車頭的擾流器設計作平衡。
其實要討一眾年輕人歡心,除了外表,耗油量可以話係第二關鍵,舊年換上全新的Powershift雙離合器六速波箱,除了可以加快換檔速度,令力量輸出更平均,亦成功減低油耗至8.1L/100km,以油價約$14.3計算,每公里只需約$1.15,完全照顧到年輕人的荷包。加上出晒名安全的VOLVO有WHIPS及SIPS等撞擊防護系統保護,又有DSTC加強入彎穩定性,即使心高氣傲的年輕人手車麻麻,總叫做多份保障教爸媽安心先啦。

VOLVOC302.0規格

引擎:1,999cc直四
馬力:145hp/6,000rpm
扭力:185Nm/4,500rpm
傳動:6前速雙離合器自動波
售價:$269,000
查詢:富豪汽車(29273388)

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載