› 選擇地區
三藩市
紐約
洛杉磯
其他美國地區
香港 台灣 北美
 
2012年06月14日

私駕路:小車載摺車 潮睇白泥日落

日日去倒模出來的商場行街睇戲食飯,你唔厭我都嫌悶。所以一係唔去,一係就去遠啲,剛好問代理借來法國潮車CitroenDS3長測四日三夜,仲唔即刻叫埋女友去白泥踩單車睇日落咩!

記者:李鑒泉
攝影:蔡家輝
Model:Ruby@PureModels、Jerry

香港邊度睇日落最靚?問十個有九個人都會答下白泥,因為除后海灣及深圳灣大橋外,下白泥更可遠眺蛇口一帶,睇住鹹蛋黃慢慢沉落夠晒浪漫。再者潮退時會露出一大片泥灘,怕危險唔摸蜆,兩口子在這裏一樣可以Hea足一個下午,儘管位置偏僻,但每逢周末周日都人山人海,單線雙程行車的深灣路更不時有警察來回趕車,泊唔到淺灘旁空地或附近燒烤場的話,大多只能停車影幾張相後匆匆離去。如果想有情調,閒日下晝五點多去到,淺灘空地無車之餘,連人影都唔多,今次我哋仲帶埋摺車去踩,踩到邊睇到邊,等到MagicHour就坐低睇日落!

睇位易轉身靈活

不過,深灣路不時有大車駛過,縱然避車處多,但稍一不慎隨時進退失據,還是小車較靈活,尺碼3,948×1,715×1,483mm的CitroenDS3就剛剛好,泊車睇位都更容易。今次借來的是入門的Chic版,配備1.6公升直四VTI引擎,輸出不過不失的120匹馬力,巡航時引擎轉數維持2,000轉左右。只是那副四前速自動波箱在慢車時會反覆在二、三波猶豫,造成乏力的錯覺,故大部份時間我都利用+/-波功能KickDown波段榨取動力。撇除引擎,DS3的車架卻異常紮實,高速入彎指向銳利,感覺久久未到極限,無論在清水灣還是石澳都讓人不自覺越踩越深。

兩部單車都擠得落

但對很多人來說,DS3卻是「整色整水」的姿整男,只因黃身黑頂的配搭特別,吸引途人圍觀外,就連剛操練完成的解放軍軍人都停車駐足旁觀,注目度毋庸置疑。廠方更提供11種車身及4款車頂顏色組合,甚至有波點斑馬紋貼紙選擇,還未算與車身同色的車匙及輪殼,襯番一套出街肯定超搶鏡。即使是入門版,但新車仍設有支援USB及藍芽的音響,一按手機就播到情歌,女友一定甜到漏。咪睇DS3車仔細細,尾箱原本已能夠容納一台摺叠式單車,翻平後座後放兩台都無問題,拍拖踩單車,去邊都得啦!

CitroenDS3Chic

引擎:1,598cc直四VTI
馬力:120hp/6,000rpm
扭力:160Nm/4,200rpm
傳動:四前速自動波Tiptronic,前輪驅動
售價:$228,800起
查詢:28344366(AutoFranceHK)

潮人摺車

「乜單車可以咁細部㗎咩?」DS3之外,兩台STRIDA摺車都成為「被圍觀」的對象。STRIDA的三角形車架摺叠後可以推着走,方便乘搭交通工具外,收藏時佔用空間又小,自87年推出後便大受歡迎,至今更衍生出不同版本,如用五輻式輪圈的LT及採用Brooks真皮座鞍、皮袋及手把的特別版等,與DS3一樣走潮人路線。

查詢:G.U.M(21373884)

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載