› 選擇地區
三藩市
紐約
洛杉磯
其他美國地區
香港 台灣 北美
 
2012年08月17日

熱玩Cool夏:自駕尋靜灘 獨享日光浴

每逢夏天,想趁假日去海邊鬆一鬆減壓,總會有躺在沙灘午睡享日光浴的念頭,只可惜這個七百萬人的小島往往將我的美夢幻滅。暑假完結前,我決意租一架開篷車四出闖蕩,尋找人流稀少的小灘曬個夠。四個由東邊玩到西邊各有特色的小灘,皆是獨自享受日光浴的好地方,靜靜過一個悠閒下午,以陽光為身心充電。

記者:許維雅
攝影:林栢鈞(部份相片由Hidy提供)
模特兒:Amy、Hidy@GME

相信大家都試過周末去石澳、淺水灣或黃金海岸等幾個大灘,人頭湧湧的恐怖程度不單止難以靜靜地躺一躺、唞一唞,就連搵位泊車都令車主苦不堪言。無車就話要逼住去交通方便的大灘啫;有車在手,其實可以去啲交通唔方便,甚至無車到的小灘吹海風曬太陽。想搵好像外國咁杳無人煙嘅沙灘?幾乎已被完全開發的香港又點會有吖。以下介紹四個小灘,雖未至於稱得上為「秘灘」,但總算知嘅人唔多、去嘅人更少,不過提醒大家,呢四個灘全都無救生員當值,所以唔建議大家游水。其實悠悠閒曬吓太陽,曬到熱熱哋去岸邊玩吓水降溫,這已是不少人港人心目中的最佳節目。

第1站:西貢相思灣 泊車最方便

靠近清水灣郊野公園的相思灣海灘可算是記者們的影車勝地,因為全香港稍為可以將車駛近海灘作背景的地方實在寥寥可數,相思灣便是其一。加上沒有公共交通直達,若由清水灣道步行落灘的話,距離一啲都唔短,所以特別寧靜方便拍攝,撞見最多的就是附近居民游水或放狗散步。除了可揸車直達唔使行,泊車亦可算是最方便的一個,灘前有一大塊空地任泊唔嬲,就連咪錶都唔使入。四個小灘之中,相思灣未算最靜、未算最靚、水質環境未算最好,但它卻是集各方大同的中庸之選,躺在沙地上,感覺最似一個隱世小灘。

路線:

由尖東帝苑酒店取車→東九龍走廊→啟德隧道→觀塘繞道→將軍澳隧道→沿昭信路及坑口道往西貢方向→迴旋處第三個出口駛向清水灣道→轉左落相思灣路直至盡頭

(路程:約20公里/時間:約35分鐘)

小貼士:1)

相思灣路口隱蔽,容易錯過,駛經一大棟深啡色的香港三育書院後,應開始收慢車速搵路口。

2)

相思灣路段十分傾斜又凹凸不平,貼地跑車款式不太適宜駛入,加上分叉路口多,最好認清地圖才出發。

第2站:五塊田小棕林 浮潛熱選

鄰近銀線灣與岩頭沙之間的小棕林海灘,是學潛水勝地,亦是浮潛友愛蒲之選,證明水質一定不俗。灘中間有一條長長石路直伸落海,應該是方便位於該處的香港風帆訓練協會落水,但我就覺得最方便玩水,好似可以企喺海面上玩咁。若嫌小灘石仔較多,灘仔尺碼細,風帆協會那邊行落少少仲有個小灘供選擇。雖然迴旋處小空地可隨意泊車,但就細得多,又要留位俾人調頭,可泊數量不多。

路線:

由相思灣出發→沿相思灣路駛出右轉清水灣道→再右轉落小路坑口永隆路→沿路直駛至盡頭後再轉一個髮夾彎繼續落山→直至駛到風帆訓練協會

(路程:約5公里/時間:約15分鐘)

小貼士:

1)坑口永隆路的路牌比起相思灣路更加唔起眼,小心錯過,大家可同時留意靠在一起的五塊田路牌。

2)過了髮夾彎後的一段坑口永隆路是一條頗狹窄的單程路,小心遇對頭車。
泊車:沙灘前有一塊小迴旋處空地或泊於小路旁邊。

第3站:西沙石灘 寧靜無際

去到泥涌,走入一條通往海邊的隱蔽小路,穿過草叢就會見到一望無際的長長石灘,無敵海景配合四周寧靜的氣氛,絕對是沉思放鬆的好地方。不過,沿灘岸邊都是碎石,想搵地方坐得舒服最好帶多一張厚少少的沙灘蓆墊,還要記住小心留意潮水漲退免生危險。其實從Google衞星地圖發現,西沙沿岸仲有好多大大小小的灘仔,大家不一定要由泥涌那邊落,可探索其他向海小路,發掘另一個寧靜小天堂。

路線:

由岩頭沙出發→沿坑口永隆路駛出右轉清水灣道→到迴旋處往西貢方向→經過大埔仔村後跟西貢路牌駛入西貢公路→經過西貢市中心後駛入大網仔路→然後再靠左駛入西沙路往馬鞍山方向→去到西沙右轉入泥涌小路直駛落底

(路程:約20公里/時間:約35分鐘)

小貼士:

1)從西貢出發,駛入泥涌小路是在西沙茶座之前,見到茶座即代表已錯過路口。

2)小路兩旁均是村屋地,若車泊路邊,最好寫上聯絡電話於車頭,另西沙路有公眾錶位。泊車:泥涌村小路兩旁。

第4站:釣魚灣泳灘 青馬靚景

想避開人浪,深井是好選擇,青山公路沿途前前後後夾埋共有七個灘。今次我選擇已暫停救生員服務的釣魚灣泳灘,較易泊車,兼人流較少。長長沙灘雖被兩個小碼頭間開,但仍有好大地方讓你躺卧享受陽光,或靜賞青馬大橋及汀九橋無敵靚景!灘的盡頭更有燒烤場,相約朋友夜少少BBQ都仲得。缺點是太近馬路,車經過時會有點嘈雜。

路線:

由西沙出發→行馬鞍山繞道經大老山公路往沙田→經城門隧道往荃灣方向→轉駁屯門公路→見深井路牌左轉落青山公路→經過麗都花園即到達

(路程:約27公里/時間:約45分鐘)

小貼士:

1)行落沙灘的樓梯位前有避車處,若有老幼隨行,可先行放低他們再泊車。

2)若唔怕行得遠,可以泊喺陳記燒鵝上面的深井新村小路,免費泊車。

泊車:麗都花園停車場,時租$18起。

Hidy推介
浪茄灣 猶如外國

身為潛水教練的Hidy經常去一些秘灘潛水,問她的首選推介?她二話不話:「浪茄灣!海水好清,啲珊瑚好靚!第一次去到,我以為自己去咗外國嘅海灘,我哋班潛水發燒友先會成日去。」浪茄灣屬於禁區保護範圍,唔俾普通私家車入,又要行山先到,難怪保持最天然一面。

全港泳灘資訊

想搜尋全港泳灘的更多資訊,可以到康樂文化事務署網頁一覽,包括沙灘設施、救生員當值時間及地圖等都詳細盡錄,不過非正式泳灘如相思灣等則欠奉。

http://www.lcsd.gov.hk/beach/b5/beach-address-tw.php

租開篷車 最低消費$1,570

為介紹有車先方便去的偏僻小灘,專登向Avis借來一部BMW323iA開篷車,最低消費(24小時)需要$2,800。太貴?可選同樣坐四個人的MINICooper開篷車,24小時需$1,570。租車時,記得帶備身份證、車牌及信用卡,因租車時需預繳按金,以323iA為例,需繳付七萬元按金以防租車有任何損毀。

查詢:28906988( http://www.avis.com.hk )

租車機會買一送一

即日起至9月3日,只要在Avis租車,同時提供夏天好去處,再上載跟租車車輛的合照至facebook的AvisHKfanspage,頭五名參加者有機會獲免費租車一天禮券,其他參加者都可獲$100租車禮券。

http://www.facebook.com/avishongkong

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載