› 選擇地區
三藩市
紐約
洛杉磯
其他美國地區
香港 台灣 北美
 
2014年12月24日

R8殺入阿布扎比 激戰華麗賽道

去過不少F1賽場,首次到訪阿聯酋阿布扎比,由抵達Yas Viceroy酒店開始,已忍不住驚嘆這條Yas Marina賽道是如何用金錢堆砌出來,難怪多個盃賽尾站也選擇於此作結,當中包括Audi R8 LMS盃,不論是落場參賽的還是在旁觀看的,也能享受其中。
記者、攝影:許維雅

為了培育年輕車手、增強賽車經驗及超跑技術,Audi已三度舉辦R8 LMS盃,一年6站共12回合的賽事來到最後一站,選址阿布扎比的Yas Marina Circuit決戰。R8 LMS盃首次在此舉世聞名的F1賽場作賽,美輪美奐的賽場區域尤其矚目,莫說傳媒雀躍萬分,就連一眾車手也表現興奮。代表Audi HK出戰的香港車手蘇誠峻(Matt Solomon),同樣是首次征戰此賽道,「呢條賽道好靚,設備好完善,顯示到金錢唔係問題嘅力量。我哋星期四行賽道嗰陣,睇見啲路真係完全平坦。仲有就係呢條賽道嘅抓地力水平好好,無論天熱定係夜晚較涼嗰陣,路面狀態都保持得好平均,唔會朝早特別甩尾,夜晚特別推頭。」

酒店夜景 靚得難以集中

完美賽道自然帶來激烈戰鬥,雖然Matt於第十二回合成功奪得季軍,但總排名成績之爭還是馬來西亞車手熊龍及澳門車手安德列.古圖的決鬥。各人分別取得一個回合的冠軍,結果由熊龍險勝,贏得賽季總冠軍,古圖屈居第二。談到賽道特色,Matt說十分享受第十一回合的夜賽,「夜晚比賽嘅感覺真係好特別,去到酒店嗰邊好靚,差啲顧住望風景而集中唔到,哈哈。至於彎位設計,我覺得最特別嘅區域就係酒店嗰一邊,有一個減速區特別難處理,因為你需要一邊轉向一邊減速,你可以睇到好多F1練習嗰陣都會飛出賽道。好彩R8有ABS系統,入彎有啲幫助。因為賽道係專門設計畀F1比賽,所以直路有啲過長,爬頭亦唔係想像中咁容易。」車迷想若親身落場感受,賽場亦有Racing School提供訓練,一日便可考取賽車牌。雖然Yas Viceroy酒店不如想像中昂貴,但要盡情享受這條華麗賽道,相信也要花點金錢才能圓夢。

KartZone 淺嚐車手滋味

覺得落F1賽場學揸賽車太激太貴,旁邊還有一個KartZone讓車迷鬥go-kart,成人每位約$232,約戰15分鐘,小朋友則每位約$116。採訪其間,大會亦有安排傳媒齊齊落場鬥車,全長800米的小型賽車賽道,共有15個不同深淺程度的彎位,賽制是先跑10分鐘排位賽,然後以圈速排位再鬥15分鐘,讓大家淺嚐車手滋味。雖然賽場路面路肩的狀態十分良好,即使車速高達60km/h,也不會像玩內地賽場般滿面泥沙,但女士或go-kart新手如我,就要三思後才落場,因為讓go-kart轉向所需的體力消耗足以令我痛足三天。

最靚賽道 Yas Marina Circuit

今次尾站的Yas Marina Circuit位於阿布扎比東海岸的Yas Island,賽道圍繞碼頭及酒店而建,入住五星級酒店Yas Viceroy更可站在露台欣賞賽事。比賽期間,賽車引擎的咆哮聲會無間斷地轟炸,是享受還是難受就因人而異了。這條被譽為全球最靚的F1賽道,是當地政府動用數億美元打造,2009年落成,全長5.554公里,共有21個彎位,可容納超過二十萬名觀眾。
查詢: http://www.yasmarinacircuit.com/en

平過水 油價每公升$3.6

比賽前有點空餘時間,於是駕駛Audi A3四出觀光,一個每公升油價只需約$3.6的國家,唔盡情飆車都有點對不起自己。由阿布扎比駛往杜拜市中心,車程約個半小時,沿途八成是六線高速公路,又直又闊,簡直一流。惟獨要小心最左快線的車,很多都揸得幾快,還有幾喜歡推人,要識趣讓車。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載