› 選擇地區
三藩市
紐約
洛杉磯
其他美國地區
香港 台灣 北美
 
2015年09月08日

【汽車籽】(MINI)MINI 當寵物 戀上臭脾氣

【汽車籽:軸芯人物】
「愛」有多盲目?不難從車迷身上找到端倪。駕駛MINI多年的潘紹恒(Adam),不理外母埋怨、不介意小問題多多,決意買新一代MINI John Cooper Works(JCW)。他還一臉欣喜地說:「好得意,不論新舊MINI都有脾氣,經常有啲小毛病,好多人覺得係MINI嘅缺點,我就覺得係佢嘅特色。」MINI人性化?「你話我儍都係咁講,我會當佢係寵物。」

眾所周知,香港車主偏愛大品牌熱門車系,往往令小眾車款難以生存,MINI JCW可說是後者之一,會以近五十萬車價搶訂新車,非車迷莫屬。駕駛第一代JCW R53 13年的Adam,為了令新寵更小眾,更選了今代新色Rebel Green,「愛MINI就係鍾意佢與眾不同,個個都黑配紅,我先唔要,我寧願亂試新色。起初代理都唔肯定邊隻綠?心諗死就死啦,青綠就青綠啦,何況MINI可以承受好多奇怪顏色。」怎料首次看見新寵,卻為他和太太帶來驚喜,「太太本來都怕綠色招搖,但原來係咁深沉,感覺更加classic,令部車更有英國味,我哋超鍾意。」
昂藏七尺揸MINI,的確要有愛,Adam年輕時已十分喜歡體積更細的Classic Mini,「細車砌低大車贏Rally,好型好勁。」但是仍要面對現實,「Classic Mini太細喇,鋼水差,所以冇買。」直至新MINI誕生,太太因為MINI那十分沉實的關門聲而御准買車,「要買當然買JCW版,不過呢部車確實唔太適合老人家坐,外母坐完後鬧鬼:『你有冇可能買架咁細嘅車!』最近換新車,佢一睇到就話:『有冇搞錯,又係佢!咁細,都唔係車嚟嘅。』笑死我。」

得間傾吓偈 行得會更順

他更瘋言MINI最獨特之處就是有脾氣,新舊款亦然,「唔少朋友揸MINI都知佢經常有啲小毛病,但只係好皮毛嘅小病,返一返廠又無事,如果揸開日本車一定激死你。你話我儍都係咁講,我一直當部舊車係人,要同佢溝通傾偈,或者說當佢係寵物。每次踩佢飆一轉之前,我都會同佢講聲,會更加順暢。仲有就係買咗新車之後,感覺舊車好生性,轉波油門都特別順,好似怕我賣佢咁。」Adam自言不忍讓其他人摧殘,會保存舊車直至它老死,而且舊車是手波,新車是自動波,可以輪流揸。
為了盡快到手,他只花了二萬多元來換上一套18吋胎軨,因為JCW版已近乎full options。但他計劃稍後更換避震,因略嫌原裝偏高,「飆彎嗰陣有啲搖晃,我知原廠有一套仲低嘅JCW避震。」作為死硬派粉絲,對於新JCW必定意見多多,例如MINI錶板置中的設計令Head-Up Display特別有用,還有車廂空間明顯增大、撥片改良、新椅設計及功能屏幕等都為用家帶來便利,惟獨抗拒向來置中的車窗操控鍵移至車門,「大勢所趨,冇辦法啦!如果之後連置中嘅大錶板都移走埋,咁就再唔係MINI,車都可能唔會再買。」
新車最大吸引力是換上全新2.0 Turbo引擎,「尤其喺高速公路起步,扭力大好多,起步快好多,我覺得完全是另一個世界。開埋Sport button,真係湧住去推你去,好好玩。」不過代價就是實際油費每公里約$1.7,如果肯用Green Mode則約$1.2,Adam最大感觸是大部份設定都大路了、軚感輕了,操控感也不像以前般raw,相信這亦是小眾車為了求存而作出改變的見證。

記者:許維雅
攝影:林栢鈞
編輯:陳國棟
美術:楊永昌

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載