蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年04月26日
馬上成為壹會員

【汽車籽】電單車頭履帶尾 極罕德軍迷你坦克

【汽車籽:馬路起義】
坦克車驚現香港?所說的,並非中國駐港解放軍那些,而是德軍在第二次世界大戰生產的NSU Kettenkraftrad HK 101。從小沉迷坦克車,又愛收藏古怪越野車的馬大立(Victor),足足用上七年時間來尋寶,再花兩個月時間申請批核及運輸,把這部1:1的兒時心頭好運到香港,然後走入上水私人越野場一展實力。只見它輕鬆四圍衝、到處爬,完全無視地形起伏,旁觀者無不讚嘆。

雖然經常於古董車收藏家處,欣賞到不少數十年前的經典珍品,是次主角卻是更加罕見的坦克車NSU Kettenkraftrad HK 101,我也不禁興奮起來。這部二戰時的德軍產物,外形酷似電單車,但以坦克車的原理運作,可說是歷史上最有趣的迷你坦克。從小迷上坦克車的Victor,30年來看過不少講解半履帶車(泛指同時配備車輪及履帶的車)的書籍,「我喺10歲嗰陣已經砌咗一架1:35嘅模型Kettenkraftrad,當年已經覺得佢非常得意。如果你鍾意坦克嘅話,你會好奇呢個世界點解有部咁細嘅坦克。」
Victor堅稱,雖然外形近似電單車,但其整體結構仍是一部坦克車,「年頭我啱啱去咗英國嘅坦克博物館,Tiger 1嘅前面就放咗一部Kettenkraftrad。大陸解放軍幫半履帶車改咗個名,叫佢做『獅身人面像』,即係非車非坦克咁解。」據說二戰時,軍隊需要一些性能很好的汽車來應付惡劣路況,車輪行駛欠缺足夠能力,即使六個車輪也不太奏效,於是改用履帶推動,尤其德軍,他們大量採用半履帶車,相當成功,「呢類型嘅車叫全地形多功能汽車,可以講係現代ATV(All Terrain Vehicles)嘅始祖,攀山能力超強之外,又超級耐用。」

拆走前輪爬坡更強

莫說Victor欲得此車多年,而滔滔不絕地介紹它的由來,即使沒有軍事常識的旁人如我,同樣充滿好奇。Kettenkraftrad的車頭用上如電單車手柄般的軚盤轉向,車頭燈被膠紙封剩一個小長方形透光口,旁邊還有一個紅十字圓蓋,打開原來是簡單急救箱,Victor強調它的轉向並非依靠前輪,「其實只要細心留意,佢係靠控制左右鏈的運轉速度嚟轉向。前輪係冇動力嘅,緊急嗰陣仲可以將前輪拆走,爬山嘅能力會更強。三、四十年代識得揸車嘅人已經唔多,要你揸住一部用兩支推桿控制轉向嘅車去打仗,你會驚㗎。」獨立駕駛席兩旁各有一個油缸,打開後面的網蓋,內藏一台1,478cc直四OHV引擎,馬力有36匹,時速可達80km,「嗰個年代嚟講,呢個速度已經好快,𠵱家嚟講都好犀利。」
坦克車的履帶鏈上有40個長方形膠墊,以6個直徑410mm至450mm的輪圈帶動。至於車尾,則有兩個背着車頭的乘客席,還有一個鐵鈎方便拖拉重物,「呢部車有三前速嘅手波箱,仲有爬山模式同馬路模式,爬山模式會慢六倍,可以拖起五噸嘅貨車,曾經有圖片顯示佢可以係平路拖住57噸嘅Tiger 1嚟行。」它的攀山能力同樣驚人,Victor駕着它衝上石屎斜坡,半個車身離開路面也不成問題。

苦尋7年只為原裝 價值約莫二手細牛

記載,1940至1945年間共生產了八千多部Kettenkraftrad,因為它是沒有炮彈及裝甲的工具車,不少也被保存下來,「原裝」約有百多部。所謂原裝,意指沒有被人劏過,「正因為佢嘅拖拉能力好驚人,戰後法國買佢返嚟劏走車頭改成拖拉機。近年呢部車開始升值,東歐有啲人會回收嗰啲拖拉機,改番去原本個樣再賣畀人,如果加埋呢啲百鳥歸巢組裝返嚟嘅版本,大概有三、四百部。但如果前軸曾經割斷過再組裝,爬山能力一定差啲,普通人唔易分辨,貪平就會買到組裝車。」
未買此車前,Victor已在eBay訂了一大堆履帶等的配件,七年來兩度緣慳一面,他仍堅持尋找原裝,最終從一個德國人手上買來這部文件上顯示為1944年出產的Kettenkraftrad,「佢喺德國申請到私家車牌,前車主喺非洲有別墅,將部車運過非洲之後再申請咗電單車牌,牌費先啱啱過期。」最後此車花了兩、三個月時間申請批文,從非洲運回來,Victor笑言也想向運輸署申請牌照,但知機會渺茫,「我蠢咗,我應該飛去德國做咗車主轉咗名先,再申請運返香港,咁牌保仲有牌費,我有權喺香港馬路行半年,奈我唔何,哈哈。」如果它在鬧市行駛,場面應該相當過癮。最後大家定會好奇這車有多貴,「視乎你認為乜為之貴,一部四十年代嘅德軍軍車,經歷過槍林彈雨,充滿歷史價值,唔應用錢嚟衡量。」多番追問下,他才透露市值約10萬美元,「買一架二手細牛都要呢個價,不過好多香港人不會買呢部車,但它係我夢寐以求嘅1:1玩具。」

軍事模型迷:感覺好震撼

砌了16年軍事模型的勞振中(Joe)擅長砌情景軍事模型,認為有情景才有故事,先可以表達他心中所說,「以往只會求真,近年主流以色彩同藝術性表達個人風格為主,技術更高嘅情景模型更易表達到,所以更受模型迷追捧。」他近期的作品是電影《戰逆豪情》中的坦克車Fury,超級細緻的造工把電影情節重現眼前,因他十分喜歡“Ideals are peaceful, history is violent”(理想就是和平,歷史就是殘暴)這一句對白。
難得有真德軍軍車出現,邀請他一同鑑賞,原來Kettenkraftrad在模型界也頗有名氣,「相信好多模型迷未砌過都會買過,因為佢係二戰德軍幾具代表性嘅軍車,越野性能高、實用性強,德軍多條戰線都有用呢部車,所以出過好多唔同比例嘅模型。我砌過1:35,可惜半途而廢,我哋砌模型就係咁,砌十件可能都未有一件完成品。」為求像真度高,經常作大量資料搜集,今次有機會看見真車,Joe也表現得相當興奮, 「大部份軍事模型迷都鍾意坦克車,以前喺博物館睇到外形,今次可以睇佢行,感覺好震撼。」他說此車履帶非常難砌,得看清它的精密設計,難怪不介意跑到上水做功課。

場地提供:MX Club越野電單車場

記者:許維雅
攝影:許先煜
編輯:陳國棟
美術:楊永昌

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載