蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年02月13日

【肥通試槍】熱賣洗車槍測試 打埋泡唔傷車但貴好多

15,630

一click免費下載《籽想去東京》旅遊指南:http://bit.ly/2rSv4c4



全新旅遊專頁,即like籽想旅行:https://fb.com/travel.appleseed

農曆新年前要洗車,相信係好多人的習慣,不過以往經驗告訴我們,要排一條長長的車龍,甚至趁此機會sell你逾千元的連打蠟套票,的確令人深有體會;肥通成日做嘢都係死線一刻,所以我冇去洗車屋好耐了,都係自己的車自己洗!更重要是摸住每一塊車身,人車交流更多,對車的損耗情況了解更深。

香港自己動手洗車係好煩,由地方的選擇以至水源等問題,都好似逼人走入洗車屋,不過如果有地方條件及時間,買支高壓洗車槍,洗架細車都只係半小時的問題,而且近年洗車槍價亦唔貴,亦可減輕你不少體力的消耗,今日肥通就找來了三支市面最多人用的洗車槍,試作一個簡單的比較。

第一支測試的是「多功能12V洗車神器」($400),行現時最流行的12V設計,水壓/使用時間為4 Bar / 40分鐘,配件有水桶、水桶蓋(連泵)、6m水喉、養魚起泡浮石、泡沫部件×2、洗車槍、洗車擦、USB充電變壓器、12V汽車點煙插及12V汽車點煙插轉換器。

老實講呢支洗車槍都相當家喻戶曉,淘寶熱銷之餘,甚至香港都有舖返貨嚟賣,第一樣係佢有個連水箱設計,一般車好多時都會預個水箱放車尾箱,有佢就已經做到;最正是十多件洗車設備全部放晒入水箱之內,擺放好歸一!不過更神者,係佢仲有魚泵養魚功能,釣友一族應該好喜歡,而且箱身紮實,還可以當凳仔來坐,以$400價錢有以上功能,的確就算佢唔識洗車,我都覺得抵玩。至於洗車能力,基本能有打泡及洗車能力,平心而論,打泡能力只是一般,雖然使用雙頭花灑噴泡,而且還刻意做窄了喉管加強水壓,不過仍未能做出打「雪花泡」的效果;至於最後過乾淨水的洗車功能,我覺得是稱職的,就算水壓是一般家用式的4 Bar,不過由於到這一刻,好多污迹都應該被起出來了,所以絕對夠用有餘。

第二支測試的洗車槍是「超前位便攜式洗車神器」($680),電壓一樣是12V,水壓/使用時間:4 Bar / 60分鐘,而配件分別有洗車泵、6m水喉×2、洗車槍、充電變壓器、12V汽車點煙插及扇形噴嘴。

可惜呢支水槍在淘回來時已被判死刑,因為肥通開箱時竟然發現有缺件!而且是十分重要的噴泡配件,我做唔成噴泡測試之餘,對比上一支「四嚿水」的多功能釣魚箱,配件多佢一倍有多,嗰下感覺是有搵笨之嫌!話說呢支槍在早年曾有超高水壓的美稱,聲稱4 Bar用到60分鐘亦比釣魚箱強,不過實際使用感覺,我只可說兩者分別不大,而且還要加上金屬箱設計,刮花後亦有生銹的潛在風險。

最最後測試的一支,是現時網上非常熱議的「WORX二代型號 WU629」($1,580),電壓使用更高的20V,水壓/使用時間有兩個選擇,分別為6.5 Bar / 60分鐘及22 Bar / 40分鐘,而配件分別有6m水喉、洗車槍、變換射水模式槍頭、泡沫槍頭、4.0電池、2小時快速充電器及45cm長杆。

一開機單論外形,WORX可以講贏九條街!電泵整合入槍身,令洗車時拖少一個機箱,只要配個水箱就可以了,的確在操作上多了一分瀟洒,不過價錢係稍貴的,逾千元的機價,的確是一個幾大的投資;不過使用上是滿意的,首先試噴泡,打出了有如雪花一般的細滑小泡沫,而且泡沫「掛」車時間近5分鐘都係一點點消退,好處是能讓清潔劑浮起污迹,亦係先前兩支洗車槍做唔到的,最後是過水時,22 Bar 的水壓真係要小心運用,水與空氣的運合越多,使用上會更慳水及潔力更強,不過如非必要,都係建議用返6.5 Bar好了,一來使用時間會長啲,而且洗車水亦不會大範圍濺及鄰近的汽車。大Bar數反而建議使用在洗軚軨及「鮑魚」位會更實際。

最後作總結,論洗車功能可以說是一面倒,WORX的各方面能力是最強的,不過問題都是價位高;相對如果你的洗車位鄰近有車,$400的多功能釣魚箱是一個幾好的慳家首選。如果你都係洗車槍玩家,或者心裏還有一個疑問,為何地上最強的Karcher K2 FollowMe(1,800人民幣、約港幣:$2,300)不見了蹤影?話說肥通自去年11月開始,透過洗車用品店與香港行貨聯繫,原本說會在1、2月間在香港推出行貨,不過最新收到消息,可能要再等至3、4月才會推出,就數值上非常吸引,電壓為36V,水壓/使用時間為50 Bar / 20分鐘,而配件有高壓水泵主機、槍柄、高壓水喉、扇形噴嘴;老實講,如果你架車唔係「地盤車」,相信都未必需要咁大Bar數去沖泥迹,估計打泡能力會非常強!不過使用拖車仔的水泵設計(連水箱),都是有人喜歡或不喜吧!

查詢:Bidlike(深水埗福華街175號福仁商場1樓17號舖)

記者:朱崇德
攝影:蕭志南

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載