› 選擇地區
三藩市
紐約
洛杉磯
其他美國地區
香港 台灣 北美
 
2002年08月17日

慳錢大班 - 左丁山

賓架陳一位師弟最近轉工,做一間外資銀行嘅高層,師弟上任後,例牌出去北京上海一行,視察市場,機票酒店等等自有秘書辦妥,唔使師弟出聲啫,臨行之日,師弟睇吓張機票,係商務客位噃,回心一諗,航程唔夠五小時,應該要坐經濟客位噃,問秘書點解同佢訂咗商務客位,秘書話:「我哋啲officer出trip個個都坐bussinessclass嘅喎。」師弟去搵「支出指引」(expensesguidline),搵唔到,因為銀行冇呢樣嘢。師弟於是欣然上機。
賓架陳知道呢件事之後,指點師弟:「你估你係蒲偉士、龐約翰咩,你要為銀行慳錢,因住俾人話番轉頭,指你作晒狀,總之入鄉隨俗,唔好變動人哋規矩,直至總行出通告為止。」
蒲偉士、龐約翰慳公司錢,慳到出晒名,因為佢哋係滙豐大班,以身作則,冇人敢話佢哋作狀。據講,蒲偉士跟足滙豐規矩(其實係佢訂下),從香港去北京都係坐economy,龐約翰有一次去蘇黎世參加亞洲開發銀行會議,畀賓架陳撞見,龐大班一個人,冇司機、冇保鑣,自己揸住一架細車仔(可能係租嘅)來往會場酒店,其他歐洲大賓架就個個坐limousine!世間上有邊個巨型公司CEO,本身唔係股東、純粹打工仔,可以咁為股東荷包着想嘅呢?以前有傳聞話滙豐可能收購美林,若果成真,文化衝突大矣。美林的話事階層可以坐私家飛機,享受豪華,滙豐大班就坐客機經濟艙?到時必有一方要讓步,合併嚟做乜吖。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載