› 選擇地區
三藩市
紐約
洛杉磯
其他美國地區
香港 台灣 北美
 
2002年08月19日

見微知著 - 左丁山

財務H被邀到大學演講,對象係幾十位中小企業嘅老闆或高層管理人員;由於演講純粹老友拍膊頭性質,賓架H演講之前,問班學生幾條問題,叫做係咁意做survey,以增加對中小企業嘅了解,當作演講酬勞。佢最後一條嘅問題係:「你哋日常睇乜嘢報紙?」幾十人之中,有五個睇《信報》,五個話睇《經濟日報》,財務H感到失望,再問:「有冇睇《亞洲華爾街日報》、《金融時報》?」個個都話冇,有幾位重舉手問:「未聽過《金融時報》,係乜嚟㗎?」
財務H事後嘆息:「幾十位中小企業管理人,原來絕大多數都唔睇報紙學吓財經評論,國際金融、增強競爭力,好令人失望。我知道香港有七成人睇非嚴肅報紙,但估唔到啲生意人,老闆階級亦然,我重以為佢哋會與大眾唔同㖭。」
雖然冇收錢,財務H認為佢演講前得到嘅資料非常有價值,以後佢對SME的研究,會有調整,例如對公司嘅管理質素,管理人性格經驗,更要特別重視。左丁山笑佢太過academic(學術),人哋睇乜報紙,使乜咁緊張吖,最多貸款之時,攞多幾件磚頭抵押便是!財務H話:「你有所不知,好多事見微知著,我嘅師傅就專係教我留意客戶啲小事。我以前跟佢去探訪一個新發財大客戶,客戶自己間房佔咗一千呎,裝飾品多多,我師傅出嚟之後,就叫我不動聲色咁去cutline。我問佢點解,師傅話此人好充,浪費資源不會長久。後來佢間公司真係破咗產!」

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載