› 選擇地區
三藩市
紐約
洛杉磯
其他美國地區
香港 台灣 北美
 
2004年03月25日

連宋冇仇報 - 左丁山

陳水扁再做四年總統,似成定局;台灣嘅行政系統、司法系統喺國際上,冇乜公信力,所以先至有咁多人懷疑阿扁中槍係自編自導自演,如果唔係,連戰做乜要求邀請國際專家加入調查?台灣啲法官是否可信?陳水扁係台大法律系最叻嘅畢業生,梗係識玩法律啦。如果唔搵外國干預,請美國啲「CSI」專家詳細調查,台灣醫生講說話,難掩天下悠悠之口。
賓架C上星期去台灣觀察,為怕競選混亂,星期五就返咗嚟。一落機就聽到阿扁中槍事件,為之一驚,因為佢臨走前,啲台灣商界朋友話畀佢聽:「連宋肯定贏。但邱義仁話民進黨重有絕招未出喎,睇嚟得個講字啫,重邊有時間力挽狂瀾呀!」賓架C心諗,唔通槍擊案就係絕招?冇咁邪吖嘛?
卒之一聲槍響之後,巧合地陳水扁自敗部復活。《金融時報》(三月二十二日)引述民進黨沈富雄對台灣學者講:「民進黨總部早已打定輸數,民意調查顯示我哋會輸六至八個百分點,但槍擊案至少改變咗五十萬張選票嘅去向。」
連宋雖然拚命抗議,但輸咗就係輸咗冇仇報,向法庭上訴有冇用,佢哋都心知肚明,重咁勞氣,就係要向支持者交代啫。兩位都垂垂老矣,以後親民黨解體,與國民黨復合,將翻生希望,寄於馬英九身上,更加實際。不過國民黨內亦會有鬥爭,立法院院長王金平亦有野心,但冇款頭做總統。以前左丁山與香港傳媒拜訪過佢(當時佢係副院長),大家都覺得此人滑不溜手,係厲害腳色,但唔似係領袖之才。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載