蘋果日報 | APPLE DAILY
› 選擇地區
三藩市
紐約
洛杉磯
其他美國地區
2004年04月17日
馬上成為壹會員

廢配額財富轉移 - 左丁山

每次地產市道起落,都帶來財富大轉移,假如豪宅渴市之勢維持到○五年尾,唔少人會發達,亦有唔少人賣樓移民。喺炒家之中,有一位紡織製衣界嘅太子N,佢同左丁山講:「假如一切按照時間表行事,明年嘅全球紡織配額就會取消,我屋企公司手上嘅配額,會冇晒價值,老竇話少少哋我哋一年唔見咗幾億銀收入,你話去邊度可以搵得番?所以趁住旺市,我不如炒樓炒幾轉,搵啲使用先!」
太子N家族都未算大輸家,最大配額持有人,一年可能唔見幾十億元㖭,冇咗配額炒賣呢條大水喉,某些家族太子,都唔知點算。太子N嘅同學太子C就啱啱相反,對配額恨之入骨,因為佢老頭子入行比較遲,十幾年來製衣出口,全賴買配額,俾太子N賺咗唔少。太子C話:「我哋先至係做實業嘅,呢幾年成衣生意出口旺盛,賺得幾和味。明年唔使買配額,肯定賺到笑,希望美國經濟順順利利,我就輕鬆晒。」太子N間家族公司,多年不事生產,只靠賣配額,太子C就拚命生產,為太子N等配額持有人賺錢。卒之等到天光,食配額之人可以上岸食利息!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載