› 選擇地區
三藩市
紐約
洛杉磯
其他美國地區
香港 台灣 北美
 
2005年08月24日

教子新招 - 左丁山

地產Y教印刷P一條計仔,印刷P欣然從命。月前,某一樓盤發售,印刷P對小P講:「嗱,我打本你去炒樓,畀三十萬你做膽,你去呢個新樓盤排隊,睇吓有冇得發圍。」小P睇報紙地產版睇得多,以為賺錢好易,第二朝一天光就起床,趕往售樓處排隊,咦,時間一分一秒過去,小P始終係企喺人龍中間,不上不落,點解呢?原來有好多人嚟睇樓,其中有啲面孔經常在名人版出現,個個都話有預約,唔使排隊。小P就當然要排啦,卒之排到黃昏,小P先至入到去。
唉,低層平價樓已經冇晒,二十樓至四十樓有海景,只餘最高嘅層數,三十八樓比二十一樓貴三分一,小P心中十五十六,唔知點揀好。售樓人員突然宣布,因時間關係,好多人重排緊隊,各人請快啲揀樓、畀支票(約五十萬元)。一位孕婦立即擠前,幾乎跌倒在地下,好彩隔籬有人扶起,孕婦二話不說,立即交支票。小P見狀,打電話畀印刷P,聲震震咁話:「點呀,好唔好買呀,就快俾人搶晒嘞!」印刷P叫小P鬆人,唔好買,小P抗議:「我排咗成日隊,你叫我唔好買?好唔抵喎?」印刷P堅持要小P鬆人,小P返到屋企,滿臉不悅之色,唔睬印刷P。
過咗兩個星期,該樓盤啲分層單位轉讓廣告,在報紙出現,多到睇唔晒。印刷P對小P講:「你𠵱家明白未?」小P亦係聰明仔,對老竇講:「買唔到唔使恨,學咗好多嘢。」呢個教仔方法,係地產Y教印刷P嘅,小P自此知道炒新樓盤,唔識人就冇錢搵。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載