› 選擇地區
三藩市
紐約
洛杉磯
其他美國地區
香港 台灣 北美
 
2005年11月25日

中大文物館內吐核 - 左丁山

公關大姐大偷得浮生半日閒,星期日趁天氣好,揸車到中大校園,停車後到處散步。中大校園陽光普照,室外氣溫降至十七、八度,唔覺得凍,而且到處樹木花草,遙望吐露港,心曠神怡,日日在中環勞碌之人,嚟到中大,成身鬆晒,壓力全消。離開校園已久,大姐大唔知道校友徑喺邊度,更唔知新設之校友園位於何處,有人話畀佢聽新亞內有「天人合一亭」,風景絕佳,係拍照好去處,大姐大根本唔識去。
佢最熟悉嘅,係中大文物館,上次到嚟,就係觀賞中大校長劉遵義外公于右任嘅書法展,呢個星期日,有前房屋署長、現特區政府派駐日內瓦經濟貿易代表苗禮善珍藏之清末民初時期嘅雕瓷展。大姐大行到入去,本以為十分清靜,點知道文物館內有好多本地遊客,大多數係長者。長者參觀文物館,係好事吖,值得推廣。
可惜呢,星期日內之中大校園,充斥不少星期天新界一日遊嘅遊客(以前叫做雞翼之友),質素良莠不齊,一啲冇秩序,冇禮貌,參加文物館之時,大聲談笑唔在講,更有老翁隨地吐核(可能食完生果啩),嚇到斯文禮貌慣嘅大姐大花容失色,因為係星期天,文物館內冇清潔女工,保安人員見狀,只得做埋清潔,但保安員冇濕地拖,情急之下,用報紙去抹地,果核連口水俾報紙一執一抹,報紙油墨甩甩哋色,於是地板都黑咗。
大姐大話香港人有時冇乜公德,中大文物館要訂下規矩,授權保安員請走隨地吐X(X代表口水,果核等等)嘅遊客,免污染地板兼令其他遊客惡心,此外,佢又希望帶領老人去中大遊覽嘅街坊會、社工、業主管理委員會、區議員等諸如此類嘅團體,唔該向老人講解吓基本市民公德!否則,堂堂大學,要在文物館內貼上「不准隨地吐核」標貼,你話幾核突呢?

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載