› 選擇地區
三藩市
紐約
洛杉磯
其他美國地區
香港 台灣 北美
 
2006年11月26日

嘈吵中國會 - 左丁山

大班C約咗成班人到中國會食晚飯,電召左丁山去參加埋一份,熱鬧吓。夜晚橫掂無事,於是立即執埋公事包,趕去中國會,點知隻腳未踏出門,電話響起,梗係聽咗電話先啦,一聽就係十幾分鐘,惟有急急腳衝去中國會,去到舊中國銀行大廈門口,收到一位C先生電話留言:AllpersonarewaitingforyouinChina。嚇咗一跳,全中國人民都等緊自己?講笑呀!
上到十三樓,大班鬧左丁山遲到,又問:「我留言喺你個秘書台,話成村人喺中國會等緊你,你收唔收到?」當然收到啦,不過留言翻譯成英文之後,走晒樣啫,ChinaClub變咗China,嚇死人咩。
「中國會」以舊中國情調為賣點,啲鬼佬以為咁嘅裝修、氣氛就係二十世紀三十年代嘅中國,好鍾意幫襯,一到咗夜晚八點,客人湧至,全會滿座,座上客幾乎全是外國人,我哋嗰枱變成係少數民族,中國會實際係鬼佬會。大班話中國會老闆鄧永鏘英文寫得好,成個鬼佬咁款,故此知道晒鬼子佬口味,間會晚晚爆棚,成個中環,只有鏞記啲生意比佢更好。
坐滿人之後,中國會仲嘈吵過中午陸羽茶室,跟住仲有歌女唱懷舊時代曲,有黃飛鴻式表演,樂聲鼓聲夾雜,直情嘈到震耳,大家講說話似鬧交,加上會所燈光比較昏暗,故此現場係法國餐場面,聲音就似戲棚旁邊,如此中西結合,只有在中國會先至會遇上。議員A話:「食廣東菜最緊要燈光火猛,睇清楚啲菜式,食法國餐先至要有燭光情調,但今晚調轉晒,原來咁先至可以吸引外國人!」外國人現在喺香港少晒,如果中國會能吸引佢哋留在香港,會係好事。議員A話好多外國朋友鍾意去星加坡,空氣好兼且到處可以用英語溝通喎,其次就係去上海,外國人面孔容易搵銀兼搵女仔,講唔講英文都冇問題啦。香港要做國際城市,需要多啲外國人留港充撐場面,中國會喺吸引外國人方面,可扮演特別角色。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載