› 選擇地區
三藩市
紐約
洛杉磯
其他美國地區
香港 台灣 北美
 
2007年03月09日

校長何須寫論文 - 左丁山

教授C「競選」城市大學校長,俾城大某些人點名批評話佢嘅學術唔及格,過去五年未有出過一篇paper。正是人怕出名豬怕肥,一聲話可能做校長,立即俾人篤背脊,學府中人其實亦有唔少心胸狹窄者、眼紅者,讀得書多唔一定係完全公正嘅。
大學管理階層,屬全職工作,一話做到校長、院長,邊度仲有時間去教書、做研究吖。教授C做科大商學院院長好幾年,成績相當唔錯,佢有時間去寫學術論文,做嚴肅研究先至奇。又例如港大高級副校長王于漸教授,係著名經濟學家,佢過去五年又出過乜嘢學術論文呀?大家上網查吓就知,唔通又因為咁,要批評王于漸冇資格做港大副校長?
八間大學之中,只有中大嘅院長(Dean)唔係委任兼全職制,既要做院長,又要教書與寫論文,有時兩頭唔到岸,所以現在中大想話效法其他大學,將院長變成委任兼全職制,等院長專心管理行政,鞭策院內教授嘅研究,此議已在教務委員會(Senate,成員係教員)得到壓倒性票數通過,只待校董會拍板。呢日碰到中大教授S,問佢點樣睇近日學院事件,S教授話:「科大C教授好有領導才能,至於佢有冇出paper,唔重要啦,佢早已有學術界聲譽地位,呢幾年轉做院長,管行政,你點期望佢有時間去研究呀!中大啲學院院長係應該改為全職制,與其他大學看齊嘅。」

有資格做院長嘅,最好係已經成咗名,有聲譽嘅教授,年紀在五十或五十歲出頭,唔需要再喺研究方面打拼嘅出名教授,一任院長做五年、再五年,啱啱好退休。倫敦商學院(LondonBusinessSchool)請美國人LauraTyson(曾任克林頓總統顧問)做院長,你估LBS想要Tyson出論文,為LBS增光咩,只係想泰臣女士幫LBS擴大人脈網,爭取捐款,增加曝光率以及全職管理之嘛,一類學者如佛利民、GaryBecker或諾貝爾獎得主等,只鍾意一生研究,唔鍾意管理,邊間大學請佢哋做院長、校長,佢哋一定唔應承。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載