› 選擇地區
三藩市
紐約
洛杉磯
其他美國地區
香港 台灣 北美
 
2007年05月29日

追求成功不為果實 - 左丁山

投資H請食飯,搵埋左丁山、老T、陸軍裝等到佢嘅飯堂「賀菊」食魚生、飲清酒,話題自不然離不開投資致富之道,陸軍裝一見老T,立即沙冧,猛話:「我抵死,一早賣晒。」老T大笑:「嗱,幾年前明益你,叫你買三八八,你賺唔到大錢,唔關我事。」陸軍裝話:「我係典型散戶,買中大快活、港交所,其士,賺咗三十巴仙就統統止賺,𠵱家見個市咁高,唔敢買㖭。」老T話:「散戶識蝕唔識賺,乃必然之理,你賣晒啲賺錢貨,手頭上仲係唔係揸住啲蝕本貨唔放呢?」陸軍裝唔敢答咯,低頭猛食「拖羅」。
講投資,老T兄老早賺到笑,可以上岸,投資H問佢:「仲係咁日日寫,仲係咁買股票,為乜呀,上岸休息吓啦。」老T話:「以我咁低嘅生活要求,七二年已經上岸,七四年蝕咗,跟住八○年又可以上岸,𠵱家更唔在講,賺錢已經唔係重要,重要嘅係證明我仍然有投資智慧。」
老T之言,令左丁山諗起大經濟學家熊彼得之言:「追求成功不是為了成功的果實,而是為了成功的本身。」所有大富豪今天仍然不斷工作,拚命賺錢,就係為了這一點。一般人搵到一億元,已有皇帝享受,無謂再捱。但世界上不分中外,大富豪仲係繼續打拼。
老T記得佢三十年前見過兩位富豪,其中一對夫妻檔已經先後過身。夫妻檔想請老T打工,老T中午時份上到佢地寫字樓,見到夫妻兩人喺度咬緊麵包當午餐,辦公室內一切簡陋,老T寒暄幾句,立即鬆人,因為佢覺得對自己都咁孤寒之大老闆,對夥計唔會好得去邊。另外有一次,佢去訪問地產元老C,又係在午飯時間。講到肚餓之時,元老C從櫃桶內拿出雞蛋三文治,畀一半老T,叫老T邊食邊訪問。一小時後,老T餓到要搵茶餐廳。老T講:「夫妻檔與元老C都有數之不盡嘅錢財,但生活上慳儉到極。佢哋搵錢嘅目的係乜?就係為搵錢而搵錢,證明自己有賺錢智慧。」老T都幾識得享受嘅,唔係元老C或夫妻檔,佢今日純粹係為投資而投資。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載