蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年06月21日
馬上成為壹會員

名牌學位 - 左丁山

英國大酒店集團洲際酒店(InterContinentalHotels)嘅亞洲公司IHGAsia行政總裁PatrickImbardelli上任一個月就辭職,理由係呢位先生申報嘅學歷與事實不符。呢位I先生在酒店界甚有名氣,在SouthernPacificHotelCorp服務多年,二○○○年,IHG收購SPH,於是I先生過檔IHG,上一個月先至升做IHG嘅執行董事。
據講I先生嘅履歷表一直申報佢係澳洲維多利亞大學學士,美國名校康奈爾大學商學士及MBA,但現在查出,I先生喺呢兩間大學上過課,修讀過課程,但從未畢業得到學位。咁就奇怪嘞,I先生在酒店界多年,點解從未有人質疑佢嘅學歷,但佢一升級做董事,真相突然大白?唔通有人故意揀時間嚟放箭?
本來酒店業嘅黃金學歷就係在瑞士讀酒店管理,再去康奈爾酒店學院讀埋MBA。但管理酒店最緊要係經驗,由低做起,從在廚房刨薯仔做到酒店總經理,先至叫做資歷完整。之不過,在公司層次,行政總裁講求管理效率,策略眼光,咁就講究有冇大學學位以及MBA嘞。呢位I先生大概冇學位都可以爬到最高層,最弊就係佢講到自己學歷好巴閉。
一啲叻人唔使學位嘅,好似蘋果公司嘅Jobs,微軟嘅蓋茨,大導演史匹堡咁,何須讀完大學,反而大學好想頒發榮譽博士學位畀佢哋。蓋茨太太捐咗好多錢畀母校杜克大學(DukeUniversity),蓋茨好似未捐過錢畀哈佛,但哈佛頒博士學位畀蓋茨,令佢非常開心,話等咗三十年咁耐,睇嚟哈佛以後一定收到蓋茨嘅支票,美國富豪鍾意捐錢畀大學,好似Blackstone(中文名百仕通)上市,主席彼德臣(PeterPeterson)年紀在八十過外,可套現十六億美元,話明會將近九成嘅錢捐予教育與慈善。另一位創辦人StephenSchwarzman於上市後會成為大股東,擁資七十億美元,相信佢嘅母校耶魯會主動搵佢捐番多少。如Imbardelli先生者,用過康奈爾大學品牌幫助自己上位,應唔應該交番啲royalty畀康奈爾呢?

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載