› 選擇地區
三藩市
紐約
洛杉磯
其他美國地區
香港 台灣 北美
 
2007年10月07日

寃枉連惠心 - 左丁山

久唔久就會睇到台灣《壹週刊》,因對台灣一啲八卦嘢冇興趣,逐頁揭完就不再翻閱。十月一日假期跑馬,左丁山應邀到沙田馬場七樓大董廂房;凡此場合,應酬多於投注,主人家話佢每次十場總共投注一千元,輸完就算,打和就好歡喜!在大董房跑馬有個好處,就係見到唔少大馬主,問吓佢哋隻馬有冇機會,都會講得好老實。譬如唐司長與許老爺養一匹「大師」(第五場),係新馬,有報紙話隻馬掂,左丁山膽粗粗問一聲,就知道隻馬仍然新嫩,未得住,暫時唔使睇;譬如見到議員L,佢話第二場買二、三、八、十四隻,左丁山話佢開玩笑。點知真係跑出八號如雷、十號過關博士連贏,加埋三號驍勇奔騰,三重彩派一萬八千八百五十一元,連贏派一千六百二十七元。急問議員L點解貼士咁準,佢話只係夠運撞中騎師綵衣顏色啫。
馬會為明年奧運馬術賽,撥出一筆基金為馬術運動員買馬備戰08年奧運,但歐洲馬好貴,動輒四、五百萬港元一隻,想買隻靚馬相當唔易。好嘞,講番台灣《壹週刊》,左丁山喺十月二號睇到九月二十七日(三三一期)一期,封面故事係「權貴豪奢,連惠心200萬買名駒曝光」,內容係講連戰千金連惠心博士(哥倫比亞大學藝術教育博士)鍾意騎馬,兩年前,以新台幣二百餘萬元買入一匹十一歲歐洲馬,運返台灣做佢嘅專用馬術座騎。台灣《壹週刊》記者大概唔識行情,話連惠心養馬十年,支出逾五百萬元台幣,指連千金出手闊氣,作風豪奢,真係笑話之至。二百萬台幣相等於大約四十八萬港幣,其實只能買到一啲並不出眾嘅低班歐洲老馬,好啱連千金騎馬健身之用,以連家嘅家財睇,連千金甚為知慳識儉,與「豪奢」二字相去甚遠。一啲台灣人對馬匹認識冇香港人咁清楚,台灣壹仔如果要寫真正「豪奢」養馬,唔該先嚟香港學習吓,無謂寃枉連惠心豪奢買名駒!二百萬台幣能夠買到甚麼歐洲名駒吖,乘大十次都未買到啦。如果歐洲名駒真係二百萬台幣咁便宜,香港馬會就唔使傷腦筋。中東酋長買馬,郁吓就一千萬港幣以上,呢啲就叫做豪奢嘞。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載