› 選擇地區
三藩市
紐約
洛杉磯
其他美國地區
香港 台灣 北美
 
2007年11月27日

貴價齋菜 - 左丁山

馬主W請食飯,左丁山欣然赴約。馬主W近來喜歡到四季酒店龍景軒,貪佢有海景與豐富齋菜菜式喎。乜馬主W改咗食長齋咩?馬主W話:「非也,不過近年人人講健康食譜,唔少朋友因宗教原因或環保、健康原因,鍾意食鬼佬所謂Vegetarianfood,仲要指明食有機蔬菜,咁啱四季龍景軒嘅Menu最多款式揀,我咪經常光顧囉。」
聽完佢咁講,左丁山立即攞份Menu睇吓。嘩,點心好貴噃,一籠蝦餃賣四十八蚊,貴過翠華茶餐廳一碗魚蛋粉(二十七蚊),比國金軒嘅蝦餃貴十蚊,亦貴過福臨門、陸羽,應該係左丁山呢類大鄉里見過最貴嘅價錢。齋菜方面,每款例牌一百八十元,唔係嘢小。馬主W點咗幾味,味道確實係好正,加埋無敵海景,算啦,好多人話物有所值,每日中午爆晒棚,訂位好唔容易㗎。
馬主W百足咁多爪,近年投資咗落一間環保公司,製造有機肥料,佢話用細菌培養有機肥料,成本甚貴,但有機肥料能夠保育泥土,唔會好似化肥咁傷害土地,故此國家好鼓勵開發有機肥。左丁山完全唔識有機、無機,只知「有機」(organic)製造大量商機。乜唔係呀,時人興講綠色,講環保,又碰啱股市暢旺,新興高級中產人人荷包腫脹,食物與用品都講求「有機」,啲號稱「有機」、「環保」嘅食物大行其道,價錢高昂,你哋去置地廣場360超市睇吓就知。四季龍景軒有諗頭,特別針對國金二期班高薪人士/留洋人士,推出有機齋菜菜式,一擊即中,大受歡迎。
左丁山對馬主W講:「追求環保,擁護有機食物,係發財立品之表現,有銀之人理應如此,不過有機食物如此昂貴,基層人士點負擔得起呀,中國目前又點負擔得起呀?」馬主W話:「你有所不知,有機食物,有機化粧品,有機乳罩與內褲在上海暢銷得很……」左丁山搶住講:「上海有好多新發財、暴發戶,唔係整個中國嘅縮影……」大家拗多幾句,突然覺得好無謂,面對美麗縮水維港,食多幾碟四十八元嘅點心,好好享受吖,養活中國咁大件事,等溫家寶去諗。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載