› 選擇地區
三藩市
紐約
洛杉磯
其他美國地區
香港 台灣 北美
 
2008年06月06日

與克林頓同機 - 左丁山

大馬主請紐西蘭種馬牧場(studfarm)主人食午飯,席設美國會所西餐廳私人房,從交易廣場四十八樓望過去西九龍,一目瞭然,適值中午陽光普照,嘉賓S爵士不禁讚嘆一聲:Whatagreatview!左丁山有同感,美景當前,和牛在餐碟中,講養馬、配種及名種血統,何其寫意也,左丁山幾乎忘記咗四十八層樓下嘅凡間實況。
可惜呢,大馬主好快就將我哋帶回現實,佢話最近到U.Penn參加女兒畢業禮,聽紐約市長彭博在畢業禮上致詞,跟住到紐約打個轉,發覺佢幾位投資銀行家朋友已經失咗蹤,律師、核數師開始驚住冇工做。目前信貸市場緊縮,IPO冇大水喉支持,併購活動幾乎亁涸,所以投資銀行裁人不絕,而專做法律顧問,專職審查顧問嘅律師、會計師行亦開始叫人放假,遲啲怕會炒人㖭。大馬主話華爾街衰退已成事實,雖然股市與統計數據未曾反映得到,大家千祈唔好唔信。經濟衰退會有利於民主黨及奧巴馬,假如奧巴馬順利進入白宮,佢會奉行保護主義,抗拒自由貿易、亞洲國家冇啖好食。
奧巴馬已經擊敗希拉莉,如果希拉莉心有不甘,退出民主黨,以獨立人士資格參選嘅話,共和黨麥凱因就有機會嘞。席中紐西蘭大馬主C話:「未必冇可能㗎,克林頓夫婦兩人,素來唔知個輸字點寫,希拉莉一味負隅反抗,爭到底,輸咗之後一怒退黨,冇人阻止得佢。如果希拉莉顧全大局嘅話,一早退選啦。講開又講,我曾與克林頓同機,發覺呢個人叻到不得了。」之不過,克林頓與希拉莉係徹頭徹尾政治動物,與其做民主黨罪人,希拉莉實會爭取做奧巴馬副手,爭取分權。
原來大馬主C去年從紐約乘機往三藩市,只得佢一個人坐在頭等艙,飛機就快起飛,即將關閉艙門之際,成隊人衝入嚟,坐在頭等艙,呢批人竟然就係克林頓與特工保鑣。馬主C幾乎嚇親,定神之後,與克林頓打招呼,想唔到克仔好好傾,打開話匣,同馬主C傾足四個鐘頭,天下大事無所不談,但當然全無機密啦,一直至落機為至,仲順手在馬主C本書簽名留念(按:西人坐飛機多數揸住一本書嚟睇)。馬主C到咗三藩市之後,同朋友講起,朋友話:「你認真行運,我哋美國人要坐在克林頓身旁,起碼要使十萬美元!」

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載