› 選擇地區
三藩市
紐約
洛杉磯
其他美國地區
香港 台灣 北美
 
2008年10月21日

泰林結業銀行更緊 - 左丁山

泰林電器突然全線結業,令人意外。泰林已有六十年歷史,左丁山係細路仔之時,已知道泰林賣靚嘢,賣貴嘢,咁老字號,久經風雨,歷六七暴動,八七股災,九七金融風暴,○三沙士而不倒,唔通今次抵唔住金融海嘯?思之令人遺憾。亦驚係一葉知秋,零售業生意難做,○九年好難捱,尤有甚者,泰林欠債一億元,拖數不少,供應商有大損失嘅話,可能骨牌式倒下,牽連更廣。
退休商家P已不問商事,只在文化藝術教育方面下工夫,到香港大學教MBA,樂得逍遙。泰林倒閉前一日,佢請左丁山到電氣街食法國餐,話明法國鄉間風味,絕不扮嘢。P老哥係熟客,叫法式燒豬、雞炒飯、西班牙火腿,加上甜品,果然正到無倫,左丁山好耐冇食過咁靚嘅西餐。但係,可惜吖,成間餐廳,只係得我哋兩個人食午飯,兩個鐘頭內唔見第三個客人行入內,餐廳點維皮呀?後來先知道,餐廳係老闆自置物業,一於唔使驚喎。

市道如此,租金應該下調至啱,但前星期聽一位商舖代理在電台講,業主仲未肯減租,亦有人願意承租,真係奇哉怪也,大概香港啲業主好有銀,彈藥充足,以前搵長咗都唔定。不過食完飯後,因食得太豐富,決定由灣仔行返中環,以助消化,咁啱在金鐘站附近碰到賓架M,佢話到太古廣場call客,左丁山笑佢:「係唔係探聽軍情啫啩,驚公司老闆唔見咗呀?」賓架M為之苦笑,佢話:「兩樣都有啲啦。現在稍有差池,就會走數,唔勤力啲睇住客戶盤生意都唔得。不過九一一之後,借貸文化有改變。我師傅話八三年佳寧風暴之時,好多客戶唔掂,啲老闆主動搵銀行搭救,希望債務重組,他日翻身,所以師傅做過好多單債務重組案。但𠵱家就唔同,有啲公司老闆走上嚟,聲大大好輕鬆咁話,我哋好唔掂嘞,會申請破產,你哋銀行睇吓點做啦!」吓,有咁嘅事,唔怪得賓架M話辛苦過師傅,老實講,如果啲老闆冇簽私人擔保又唔講面子,全無牙齒當金使呢套古老道義作風嘅話,一走了之,確係幾輕鬆。既有如此情況,明年銀行唔收緊信貸,吾不信也。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載