› 選擇地區
三藩市
紐約
洛杉磯
其他美國地區
香港 台灣 北美
 
2008年12月24日

聖誕消費 - 左丁山

星期日做冬,晚上到餐廳吃晚飯,嘩,逼到爆,夥計做到踢晒腳,淨係咁睇,唔覺得有甚麼金融海嘯噃,香港人仍然有消費力嘅,不過冇以前咁肯花錢啫,但遇上大節日,一樣願意使錢。
飯未食完,家中老人家已經講到農曆年快至,要訂定位團年,明年年三十晚係○九年一月二十五日星期日,人人有假放,本應最啱團年,點知是日為執日,適值歲破,宜祭祀掃舍,當然不宜團年,反而一月二十四日星期六年廿九係定日,好日也,多事皆宜(通勝話忌癸亥、丁亥生人,即係話此兩年出生之人不宜)。信教之人當然唔信呢樣嘢,總之悉隨尊便,但相信明年一月廿四日之酒樓(如尚未歲晚收爐嘅話),又會客似雲來。
前幾日碰到旅遊H,佢間大寶號高調派花紅四百萬,可見生意甚佳。旅遊H話香港人仍然有錢旅行,只不過今年聖誕與農曆年相距只有一個月,好多人選擇農曆年出外,故此聖誕出外旅遊人數,稍見遜色。旅遊H話:「幣值貶值地區,例如南韓,最受歡迎,農曆年南韓團已經爆晒額,至於去泰國,大家仍然驚驚哋,如果你唔驚嘅話,曼谷酒店抵住到極!」
查吓日曆,如果在聖誕遠遊,假設一星期五天工作,要告假三日(十二月二十二、二十三、二十四),共請假三日可以放九日假(十二月二十至十二月二十八),但農曆年間,放假九天只須告假兩天(一月二十九、三十),有少少着數。既然如此。好吖,聖誕期間,大家留港消費,帶旺個市,有益本地經濟。不過大家唔係曾特首與唐司長,去工展會及銅鑼灣消費,未必須要用幾千至一萬元嘅。做高官現在似乎要做埋演員,出街用錢,要浩浩蕩蕩,叫埋記者隨行影相報導,真係難為了他,亦可能被人批評公開為幾個牌子/商店宣傳。但唔出嚟嘅話,又會俾人批評唔肯起示範作用!照計我哋香港人識得幾時使錢嘅啫,高官做騷,其情雖可感,實際未必有效。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載