› 選擇地區
三藩市
紐約
洛杉磯
其他美國地區
香港 台灣 北美
 
2009年05月17日

RDA善事盛事 - 左丁山

賓架Y約往占美廚房食飯,在座有兩位小姐,皆中環高人,在金融界及公關界響噹噹,賓架Y話明唔好講公事,否則影響胃口,大家一致話好。兩位小姐原來鍾意聽中環八卦逸事,陳年古仔,賓架Y就係呢方面專家,左丁山間中補充一兩句,公關董事Y聽到入神,竟然提議我哋兩位開條電話熱線講故事。
茶餘飯後講吓就得啫,點可以正式公諸於世。講馬就不妨大聲,公開地講。鄰座有賽馬專家、大馬主在,左丁山多口問句:「各位專家有冇救命貼士,呢排好唔掂也!」馬主C話:「嗱,八場十二號,熱啲都殺。」返到寫字樓,拎本馬經睇吓,第八場跑九龍木球會(KCC)百週年紀念盃,十二號就係「相見歡」,呢隻馬跑三次,得一冠一亞一季,顯然係熱門爭勝分子,馬主有鍾先生、蔡律師、胡醫生(余若薇丈夫)等等,全部係「聖保羅男女」校友,作風明朗人士,信得過噃,對手當然係一號「喜萬家」,八號「天生我財」,十一號「威威財星」,九號「安御」。
呢場盃賽由KCC主席BurjiShroff先生夫人頒獎;Shroff(施羅夫)係印度大家族,中環都爹利街律敦治大廈就係大馬主施羅夫(「飛馬王子」等馬匹馬主)家族嘅,呢位大馬主係鄧律敦治後人,最鍾意做善事與跑馬,其實好多馬主平時捐錢不甘後人,好似「香港傷健策騎協會」(RacingfortheDisabledAssociation)就有好多馬主與馬圈人士支持,去年辦殘奧馬術賽辦到有聲有色,奧運過後,繼續在薄扶林與屯門為香港傷健人士提供策騎治療。辦咁多活動,錢從何來?靠捐錢啦,前星期五(五月八日)RDA在君悅酒店辦慈善晚宴,請國泰航空樂隊YoungOnce演唱兼伴奏,搵到黃煜坤(風雲小子)、冼鏡煜(蓮華生輝)、李文彬(包裝系列馬)、徐雨石、史立德(好先生)、楊紹信(喜得法,羅兵咸永道主席)、郭少明(終身美麗)、林賢奇、陳衍里醫生、梁安琪女士等等贊助唱歌,上台為善款獻唱人士有周一嶽、孫明揚、陳祖澤、葉錫安等等,更唔少得前立法會歌王馮載祥與馬圈RobinGibb,即係吳嵩,吳嵩唱完Holiday,再扮羅文唱「家變」,「精英大師」馬主施雅治話聽出耳油,上台獻花畀吳嵩㖭。籌款當然唔少得拍賣,陳衍里醫生買咗一瓶82年LafiteRothschild,施雅治買咗寶齊萊名表,全晚籌得善款189萬!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載