› 選擇地區
三藩市
紐約
洛杉磯
其他美國地區
香港 台灣 北美
 
2009年07月30日

敬業樂業志未酬 - 左丁山

馬壇前輩,幸運W賞面,相約吃飯,佢話要靜啲地方傾偈,最好唔去茶樓,因為嗰度相熟老友多,茶客又多,聲聲入耳,容易分心也。聽前輩所言,到跑馬地滿貫廳,隔住大玻璃望馬場,誠賞心樂事。馬場內有行人道或緩跑徑,中午烈日當空時份,仍然見到一啲中年人在此慢行或慢跑,自己不禁慚愧。賓架K退休後雖然仍然返銀行做顧問,但工作輕鬆好多,放工後就到跑馬地跑幾個圈,故此身體不肥不瘦,唔見有肚腩,難得也。
幸運W就話,五六十年代著名騎師陳毓麟今年已有八十四歲,旁人望去,以為佢只有六十幾,身體弗到極,可以在跑馬地緩跑三圈,面不改容。經佢提起,記得今年曾在沙田馬場沙圈見過陳毓麟,啊的一聲叫起來,想唔到阿爸時代嘅騎師竟然如此年青也!
問幸運W:「今年貴庚呀?」前輩笑曰:「八十六歲咯,四幾年戰後回港,在利舞台戲院做咗近十年,之後搞印刷,同人印馬經,到咗五五年自己出版《幸運馬經》,寫馬至今五十四年,乜嘢未見過!」真想唔到,八十六歲人仍然如此生猛,刨馬好有心得,至今仍然經營印刷及馬經生意,仔女各有成就,唔似會接棒。計起嚟,馬圈耄(音帽,八十九十曰耄)英,除幸運W外,左丁山仲識得老五、晨鳥、老惠,可視為馬經四長老,佢哋講嘅古仔就係歷史。本港傳媒人之中,相信除咗四老之外,冇其他作者、編輯、老闆會有咁大年紀而仍然活躍於業界。
幸運W話六十年前,報館多數設於中環,每天晨早,報販發行雲集於利源東街交收,《成報》何文法先生朝朝捧着一個袋與發行交收,逐毫子計,卒成為報業大亨,可見創業維艱,「一粥一飯,當思來處不易」!幸運W創辦《幸運馬經》,初期一腳踢,至今樂此不疲,可算係敬業樂業之典範。W老兄身懷梁啟超〈志未酬〉一文,畀左丁山一讀,老兄原意係鼓勵子女不斷向上,不可有少許成就便志得意滿,此亦夫子自道也,若非有堅決意志,老兄點會到咗八十六歲仍然鬥志昂揚,不肯言休!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載