蘋果日報 | APPLE DAILY
› 選擇地區
三藩市
紐約
洛杉磯
其他美國地區
2009年08月10日
馬上成為壹會員

十五食齋 - 左丁山

公關靚女S安排午飯,物業W請客,地點居然係世貿中心功德林,左丁山不禁滿肚狐疑,好少人請吃飯係去齋舖嘅啫。如時應約,物業W一坐低立刻說明:「太太每逢初一、十五就食齋,一年前我都跟隨,發覺一個月食兩次齋,對健康好有幫助,於是養成初一、十五皆食齋嘅習慣。」物業W並非信佛、信神,只係覺得食齋對身體有益處啫。左丁山平時好少睇夏曆,邊會記得初一、十五係邊一日吖,所以對午飯食齋之約,初時覺得有啲愕然,聽完物業W解釋,方知其道理。左右望吓,呢間功德林午市好旺喎,女客人尤其多,乜齋舖咁好生意嘅?一點半鐘嘞,門口仍然有人排隊。物業W話:「今日係十五吖嘛!」一言提醒,原來香港有不少人係逢初一、十五食齋嘅。
靚女S講畀左丁山聽,佢在中文大學係讀宗教研究嘅,以前個個以為佢識神學(基督教、天主教),事實不然,佢話讀書時讀過天主、基督、佛、道,四大教嘅教義皆有涉獵,現在中大已有上述四個宗教研究中心,假如搵到中東油王/酋長捐款,就可以成立埋伊斯蘭教研究中心,五教齊備。左丁山都係第一次碰到一個宗教系畢業生啫,佛學碩士就識得好幾個,例如林煥光。物業W話佢發覺佛教徒好似越嚟越多,唔知係乜理由,怕且有部份與名人效應有關,李綽芬教授、潘宗光校長、王永平、林煥光等人信佛,有啲影響力o架。

靚女S話中大有道教研究中心,唔怪得有時揸車經過中文大學,睇到大埔道上有二、三十位道士列隊上山,好可能係中大學生嚟。據博士L講,中國大陸嘅新一代道士,對道教禮儀、法事儀式、道袍等等,因文革造成斷層,已不甚了了,故此不斷派道士來港到中大道教研究中心研習,故此中大校園內外,不時見到道士。睇番上星期嘅《大公報》,咁啱有篇報道講到近四年來有九十位內地道長到中大研修。武俠小說之中嘅崑崙派、峨眉派、武當派、青城派高人,皆以道長為主,勢想唔到,內地道長今日竟會到香港求學,由本地蓬瀛仙館支持。不如咁嘞,中國繼峨眉山、青城山、武當山、崑崙山之外,再在香港馬鞍山起多一個道觀,就叫做鞍山派啦!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載