› 選擇地區
三藩市
紐約
洛杉磯
其他美國地區
香港 台灣 北美
 
2009年09月18日

再有私有化 - 左丁山

自盈科拓展透過附屬公司Starvest聯同網通私有化電盈一案遭上訴庭裁決失效後,用協議安排(schemeofarrangement)方式嚟私有化上市公司,變得十分困難,律師與財務顧問為之談虎色變,因為即使特別股東大會通過,法院會議通過,私有化方案仍然有機會俾法官運用酌情權否決。律師與財務顧問識得計數,識得滿足一切法律程序,但斷斷無法預料法官如何運用酌情權。
本以為公司私有化呢類事件,在法例未修訂之前,唔會有人做。點知呢日偶然在網上睇到一宗私有化案,竟然係使用「協議安排」進行嘅?唔通有人偏偏要向難度挑戰?於是搵資料睇吓,睇落十分有趣,就係獨立財務顧問向獨立董事委員會提交報告,建議反對私有化,獨立董事會之中,有一位話明反對私有化,亦有一位質疑獨立財務顧問之建議。呢類事件比較罕見,獨立財顧與獨立董事點解會傾唔埋呢?
睇吓間公司做乜生意?一睇就唔合胃口,呢間四通(編號409)啲股東似乎好難憑股價賺錢喎,如果話已經入咗貨,後悔咯喎,快啲沽啦,揸住四通股票要嚟做乜?呢間公司嘅生意十分多元化,有健康產品,有電子網絡、連鎖網吧(internetcafe)、有線電視、房地產、流動通訊服務、礦產資源勘探等等,睇落全無協同效應,生意東一啲,西一啲,不知核心業務為何。業績方面,○七年(至三月三十一日止)賺二億九千八百六十萬元,○八年賺一億四千三百六十萬,倒退五成二,○九年虧損四千七百七十萬元,正是王小二過年,睇股價,過往五十二周最低係$0.15,最高係0.46,私有化價格係$0.48,但過往每日成交額好低,冇流動性,有息派。獨立財務顧問認為如何呢?意見有五點:(一)低流動性;(二)高波幅;(三)私有化價格與市場價格比較,有合理溢價;(四)業務前景穩定;(五)與○九年三月三十一日資產淨值比較,私有化價格折讓63.8%,睇前三點,股東會贊成私有化,第四點屬中性,睇第五點就會反對私有化。獨立財顧最後建議股東反對,相信就係單憑第五點一點咁多啫,不知何時何日返家鄉,其實小股東最好就係趁近日有成交,價錢去到$0.415,沽之哉,收錢再炒內銀股或者買藍籌股收息好過,如果唔肯以$0.415賣,投票贊成私有化希望可以取回$0.48最實際,曹Sir有明言,唔好同股票談戀愛,要談嘅話,都搵隻滙豐或中電啦,點解要同四通呢隻四不象嘅股票談呀?

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載