› 選擇地區
三藩市
紐約
洛杉磯
其他美國地區
香港 台灣 北美
 
2009年09月27日

議價何須立法禁止 - 左丁山

學生Y在中大選修蔡子強一科,大概係政治學導論一類,佢講得語焉不詳,左丁山亦聽得唔多清楚,唔得閒去查清楚。未開學前,學生Y揸住蔡子強本《新君王論》猛咁讀,肥仔K笑佢:「蔡子強指定讀本呀,自己寫書叫學生買,幾好噃!」學生Y話:「唔係呀,我到圖書館借o架,讀吓想知道蔡子強點樣分析政治現象之嘛!」肥仔K講:「要識咗政治學先至識諗花招,未識就學習如何化妝、包裝,有啲本末倒置,你不如借正本《君王論》,即係Machiavelli嘅ThePrince,讀咗先啦。」
學生Y就話《新君王論》易睇好多噃,蔡子強嘅中文又易睇過Machiavelli嘅英文(原文為意大利文)譯本易讀好多喎,咁講法,好難相信學生Y有動力去讀《君王論》。
蔡子啲觀察力有時係一針見血嘅,佢寫過關於「環保塔利班」,最近又寫「指引主義」與常識、判斷之死,都好到肉,蔡子講得啱,政府成日話出指引,傳媒評論員成日鬧大機構唔發指引……以為「指引一出,四海安寧」,簡直係大笑話。明愛醫院夠多指引啦,人人執正嚟做,跟足指引嘅話,完全冇變通,完全冇酌情權,咪會搞出個大頭佛囉。消防員上天台救火救人救貓救狗之時,係唔係要帶埋本指引到現場呀!
立法會議員往往以為立法、立指引就可以解決問題,其實係過份執着,受過法律訓練嘅議員仲弊,以為立法管制可以解決所有問題,例如的士議價,左丁山從來唔講嘅啫,但在市場不景之時,有司機自願減價搶客,乘客唔會反對吖嘛?如果在公路上,一個乘客與一個司機議價,一個願畀,一個願受,警察點會知道呀?立法會議員指政府對此視而不見,聽而不聞,廢話連篇,其實啲議員先至係廢話一大堆,凡立法而難執法之事,最好交由市場解決,否則執法不成反而傷害政府公信力。立法會諸公請用吓commonsense或者讀下蔡子強推介嘅"TheDeathofCommonSense,byPhilipK.Howard"。當經濟回復好景,人人荷包腫脹之時,的士求過於供,你估的士司機會肯自願減價咩!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載