› 選擇地區
三藩市
紐約
洛杉磯
其他美國地區
香港 台灣 北美
 
2009年12月02日

杜拜風流已久 - 左丁山

賓架L請食蛇羮,群賢畢集,是日股市大跌,大家一齊問賓架L有無受「杜拜世界」賴債影響,賓架L醒目過人,那肯透露半句口風。本地銀行有個好處,就係好少中東貸款,所以杜拜爆煲,與香港銀行無關,但國際性銀行素來在中東石油生產國十分活躍,杜拜爆煲,渣打、滙豐股價立即大跌,避無可避。賓架L去過杜拜考察,當時適值好景,杜拜旺到不得了,全球最貴嘅酒店就在此地,訂房名單長一長,要輪候入住。賓架L風聞杜拜無公共交通可言,人人都揸車,每日道路上擠塞得很,故此直情入住一間最近機場嘅酒店,在窗口可以望到機場跑道,諗住最為可靠。點知道,上機回港之時,烈日當空,四十幾度,拖住一件行李行去機場,點都要全身濕晒至得,於是坐酒店車前往,一出酒店就慢如蝸牛,去到機場,國泰航機起飛了,唯有趕搭Emirates返港。賓架L話:「此乃我多年來第一次趕唔到飛機!」一個地方但凡有此極度塞車現象,並非佳兆,而可能係泡沫高潮期。
又係嗰句:有咁耐風流。杜拜酋長麥通乃全世界最有錢嘅馬主,乜嘢靚馬都俾佢買得七七八八,以後可能冇咁豪氣,益吓其他馬主,買馬冇咁貴。
左丁山未去過杜拜,只知前年建築界人士有好多去咗打工,十分好景,家反為要為啲建築師樓擔心,收賬有冇問題呀?不過對香港有度好,不少人才因此回流,適值香港十大基建項目求才若渴,等杜拜沉下先啦。
賓架L間銀行宴會廳,食物水準甚高,最難得嘅係能夠保持平穩,幾十年冇退步。唔少名店曾經好好,隔幾年就無以為繼,日漸失色,令客人失望。好似曼谷香格里拉嘅香宮,左丁山每逢去曼谷必到,但今次回港之前,特登走去食晚飯,咦,唔掂噃,喼頓推介之清蒸筍殼,無甚味道,與吉隆坡海外天之筍殼,差好遠啫,乳鴿冇味,乳豬唔脆,沙鍋煲仔翅好一般,祇有椰皇燕窩仍然唔錯,唉,退晒步咯,以後可以慳番,不如去四季(前曼谷麗晶)食SundayBrunch,起碼酒水任飲,食到捧肚,價錢雖貴而覺得物有所值。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載