› 選擇地區
三藩市
紐約
洛杉磯
其他美國地區
香港 台灣 北美
 
2009年12月18日

多指引多成本 - 左丁山

參加新城財經台「香港經濟峯會2010」,見到好多朋友,峯會每年由滙豐全力策動,故此會場內有唔少滙豐客戶,其中一啲與左丁山老早認識。碰到一位廠家C,問佢生意近況如何!佢話:「唔死得,捱完一年海嘯之後,啲單慢慢返番嚟,雖然利錢不如理想,有單總係好過吃白果。」其實廠家C老早搵長咗,今天將間廠關門佢都夠享三代,但係廠家C話做開總係要做,養住一班職員工人,唔使蝕入肉佢都想繼續下去。去年冇單之時佢甚為得閒,有時間周圍行就弊咯,買咗幾手ELN,接貨後到家都未返家鄉,左丁山笑佢:「使唔使上街示威,抗議銀行誤導呀?」廠家C講:「儍嘅咩,其實我自○三年開始玩ELN,賺過唔少,○八年一次過輸番晒而已,唔可以怨銀行嘅。要怨嘅就係現在去銀行買產品,一定要聽一番風險評估,要錄音,攪到鬼咁煩。銀行產品經理一邊講,我就一邊睇《蘋果日報》,到佢講完,錄晒音,我就簽字作實,邊處有心機聽位經理稟神吖。」
呢啲人唔使金管局指引保護嘅,但全世界監管當局都話要收緊條例,偏重保護投資者,一味增加銀行成本,至於效果如何,從不見有人分析研究,硬係認為越多條例越多指引越好;或者真係有用嘅,但金管局或者應該撥款畀大學教授,對加強監管投資產品銷售之真正成本效益,做一番詳細、深入嘅研究。香港麥當勞之開山始祖伍日照博士(希望冇記錯)就曾經講過,做到百分之九十五完美,並不困難,但係要做到百分之一百完美,睇落似乎只係增強五個百分點,但成本之高會遠遠超乎想像,成本與得益不成比例。目前銀行銷售產品程序是否在此階段呢?

峯會演講嘉賓唔少,陳德霖預警資產泡沫風險,王于漸講人才競爭,指出香港人大陸人通婚數目日增,香港人口結構會有一番變化,李小加講港交所不怕外來競爭,曾俊華話「上善莫若水」,必須靈活多變,王冬勝講人民幣結算,各有見地噃,曹仁超就話2010年嘅黃金股市外滙都進入有波幅冇升幅階段,總之要順勢而行,熱錢來港就買貨,熱錢流出就夾貨,問題係大家有冇咁醒目啫。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載