› 選擇地區
三藩市
紐約
洛杉磯
其他美國地區
香港 台灣 北美
 
2010年02月10日

歡迎高錕 - 左丁山

高錕教授衣錦榮歸,獲得諾貝爾獎之後,回加州山景城休息兩個零月,卒於二月初獲邀回港出席中文大學及聖約瑟書院嘅歡迎會。首先在二月五日上午,高教授返回中大,出席「桂冠學人返故園」(TheLoreofaLaureate),聚會在何善衡工程學大樓舉行。中大之有工程學院,係高錕當校長(1987-1996)之時建立嘅,記得當年佢講過中大工程學院唔想與港大看齊,開設土木、結構、機械、電機等硬工程學系,而要設立電子、訊息、電腦等軟工程學系。今次歡迎會特別選在工程學大樓舉行,當然係有內裏原因嘅。
左丁山入到工程學大樓,坐好之前,遇到老學長森哥與太太,森哥話高教授剛於二月四日從台灣返到香港,一落船就坐車去咗中大校長府「漢園」,劉遵義校長親自向高教授解釋,點解在二月五日之歡迎會上,佢會缺席,因有急事上京也。點解高教授會去咗台灣一行呢?森哥話:「事先要保密,現在唔怕講。高教授之聖約瑟同班同學特別安排坐郵輪往台灣一遊,因我與佢哋幾熟,搵埋我一齊去。郵輪方面一知道有諾貝爾獎得主上船,特別upgrade,高教授入住貴賓房,安排私人房間進膳,但高教授鍾意周圍逛逛,在餐廳用膳,我哋恐怕被人認出,成班人圍住教授,戴埋帽,但眼利嘅香港遊客一樣認出,紛紛走埋嚟影相。去到基隆,台灣方面好似唔知道高教授在,冇人嚟迎接,合晒我哋心意,否則在台灣會應接不暇,累壞教授。總之全程好好玩,高校長玩得好開心,雖則話佢已有癡呆症,但與太太跳舞之時,乜嘢舞步都記得,唔見有生疏噃。」

森哥就開心啦,能夠陪高校長伉儷等人遊船河,我哋恨都恨唔到。是日歡迎會由鄭海泉(校董會主席)主持,大學監督曾蔭權、大學首席副校長華雲生教授、兩位諾貝爾獎得主楊振寧(博文講座教授)與莫理斯爵士(晨興書院)院長等等主禮,台上一字排開,竟有三位諾貝爾獎得主在,呢個陣容,香港只有中大先至排得出。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載